Արամ Սարգսյանը փորձում է զենքի մատակարարման խնդիրը «պեչենու բաղերը» գցել, բայց նա լավագույնս գիտի, թե բանակի փողը լափողների հետ Վազգեն Սարգսյանն ինչ էր անում. Միհրան Հակոբյան
Սահմանադրական հեղաշրջման օրը Հանրայինի հարցազրույցի տաղավարում ժողովրդավարության ու արևմտյան արժեքների թունդ սիրահար, իմ շատ սիրելի Արամ Սարգսյանը մոռացավ ասել, թե ժողովրդավարության և արևմտյան արժեհամակարգը կրող քանի՞ երկիր գիտի աշխարհում, որտեղ Սահմանադրությունը փոխում են հերիք չէ առանց հանրաքվեի, մի բան էլ` առանց խորհրդարանական ընդդիմության ներկայության: Այս մասին ֆեյսբուքյան իր էջում գրառել է քաղաքական, հասարակական գործիչ Միհրան Հակոբյանը:
Նրա գրառումը, որը վերնագրված է Բանակի փողը լափողին Վազգեն Սարգսյանն ի՞նչ էր անում. այս հարցի պատասխանը լավագույնս գիտի Արամ Զավենի Սարգսյանը», ներկայացնում ենք ստորև.
«Սահմանադրական հեղաշրջման օրը Հանրայինի հարցազրույցի տաղավարում ժողովրդավարության ու արևմտյան արժեքների թունդ սիրահար, իմ շատ սիրելի Արամ Սարգսյանը մոռացավ ասել, թե ժողովրդավարության և արևմտյան արժեհամակարգը կրող քանի՞ երկիր գիտի աշխարհում, որտեղ Սահմանադրությունը փոխում են հերիք չէ առանց հանրաքվեի, մի բան էլ` առանց խորհրդարանական ընդդիմության ներկայության: Ավելին` փորձում են ԱԺ կանոնակարգ-օրենքը փոխել և շրջանցելով պետության գլուխ հանդիսացող նախագահին` իրենց ընդունած հակասահմանադրական օրենքը դակել ԱԺ նախագահի մակարդակով: Այսինքն` սահմանադրական կարգ տապալողները նույնիսկ ֆորմալ ձևականությունների հետևից չեն ընկնում, շատ ուղիղ հաստատում են բռնապետություն:
Արևմտյան արժեհամակարգը կրող քանի՞ ժողովրդավարական երկիր կա, որտեղ իշխանություն կոչված մի խորհրդարանական խմբակցությունն ինքն իրենով հավաքվում ու հավսար-զգաստով սահմանադրական կարգ է տապալում: Բայց այս հարցը, թերևս, մի կողմ թողնենք: Որովհետև Արամ Սարգսյանը քաղականության մեջ է այն ժամանակներից, երբ ես դեռևս դպրոցական էի, և փորձառությունն իրեն պետք է հուշի սպասվող գործընթացների մասին, այն է` չկա՞ սահմանադրական կարգ, չկա՞ պետական իշխանություն, կա խունտա, սրանց պարագայում` փողոցային ընտանիքապետություն: Հետևանքի մասին չխոսենք, շատ շուտով բոլորս այդ հետևանքը տեսնելու ենք բարիկադների վրա»,- գրել է Միհրան Հակոբյանը:
Նա ապշեցուցիչ է որակել Արամ Սարգսյանի խոսքերն այն մասին, որ Հայաստանում «ռուսական 5-րդ շարասյուն» կա: Իր խոսքով՝ Արամ Սարգսյանի կողմից ընդդիմությանը «ռուսական 5-րդ շարասյուն» հռչակելն ուղղակի զավեշտալի է:
«Իսկ աբսուրդն այն է, որ իմ շատ սիրելի Արամ Սարգսյանը փորձում է զենքի մատակարարման խնդիրը պեչենու բաղերը գցել: Թե բա` «որոշ քաղաքական գործիչներ անգամ ասում են` Հայաստանին զենք մի տվեք, որովհետև իրենք էդ զենքը կարող են ծախել ուրիշներին»: Պարոն Սարգսյան ջան, չեն ասում զենք մի տվեք Հայաստանին, այլ կոնկրետ փաստ են հրապարակել, շատ կոնկրետ: Փաստ, համաձայն որի` ձեր սիրելի վարչապետը ոմն պատրոն Դավիթի հետ, օգտագործելով Հայաստանի Հանրապետության կնիքը, զենքի բիզնեսով փող է աշխատել, մեծ փող: Այսինքն` դաշնակից Ռուսաստանից ներքին գներով զենք են առել իբր թե Հայաստանի բանակի համար ու այդ զենքը խուրդել են երրորդ ու չորրորդ երկրներին: Շատ բան չասեմ, բայց ազգովի աղոթենք, որ հերքվեն օդում կախված այն լուրերը, որ երրորդ ու չորրորդ երկրներին Նիկոլ Փաշինյանի ու պատրոն Դավիթի ծախած զենքը Աֆրիկայում ու Մերձավոր Արևելքում աշխատել է ռուս զինվորականների դեմ»,- գրել է նա՝ շարունակելով,-« Չեն պլստալու, բանակից գողացած փողը կոպեկ առ կոպեկ վերադարձնելու են: Եվ, ով ով, բայց Արամ Սարգսյանը լավագույնս գիտի, թե բանակի փողը լափողների հետ Վազգեն Սարգսյանն ինչ էր անում»: