«Սաակաշվիլին թող կողմնորոշվի, թե ինքը որ երկրի քաղաքացի է». Կալաձե
Ժամանակն է, որ Վրաստանի նախկին նախագահ Միխեիլ Սաակաշվիլին կողմնորոշվի, թե ինքը որ երկրի քաղաքացի է և որտեղ է ուզում աշխատել: Այս մասին հայտարարել է Վրաստանում իշխող «Վրացական երազանք» կուսակցության գլխավոր քարտուղար, Թբիլիսիի քաղաքապետ Կախա Կալաձեն, գրում է sputnik-georgia.ru կայքը:
«Սաակաշվիլին Ուկրաինայի քաղաքացի է և այնտեղ ինչ-որ պաշտոն է զբաղեցնում: Արտերկրի քաղաքացին չի կարող միջամտել այլ պետության գործերին, դա անընդունելի է, և դրան պետք է արձագանքել: Թող նա կողմնորոշվի, թե ինչ է ուզում, որ երկրի քաղաքացի է և ինչով է ուզում զբաղվել: Նրան ոչ ոք չի խանգարում, նա կարող է վերադառնալ, և այդ դեպքում նա ստիպված կլինի պատասխան տալ ժողովրդի ու երկրի դեմ կատարած հանցագործությունների համար»,-ասել է Կալաձեն:
Միխեիլ Սաակաշվիլին այժմ Ուկրաինայի քաղաքացի է և զբաղեցնում է Ուկրաինայի Բարեփոխումների ազգային խորհրդի գործադիր կոմիտեի նախագահի պաշտոնը: Չնայած դրան, նա սոցիալական ցանցերի իր էջերում ակտիվորեն քննարկում է Վրաստանի քաղաքական իրադարձություններն ու չի թաքցնում իր մասնակցությունն այն երկրի քաղաքական կյանքին, որտեղ ինքը նախագահ է եղել: