Պակիստանում օդաչուների 30%-ը կեղծել է արտոնագրերն ու թռչելու իրավունք չունի
Պակիստանում քաղավիացիայի յուրաքանչյուր երրորդ օդաչուն թռչելու իրավունք չունի, քանի որ արտոնագրերը կեղծված են:
Ինչպես նշում է CNN-ը, այս մասին խորհրդարանում ելույթի ժամանակ ասել է ավիացիայի նախարար Գուլամ Սարվար Խանը՝ մանրամասնելով, որ ներքին ավիաուղիները սպասարկող 860 օդաչուից 262-ն անձամբ չի հանձնել քննությունն ու այդ ծառայության դիմաց վճարել է ուրիշներին:
«Նրանք թռչելու փորձ չունեն»,-ասել է Խանը՝ հավելելով, որ Պակիստանի միջազգային ավիաուղիները թռչելու իրավունքից զրկել է բոլոր այն օդաչուներին, որոնց արտոնագրերը կեղծված են: Խոսքը 150 մարդու մասին է:
Ինչպես ավելի վաղ հայտնել էր Tert.am-ը, նախորդ ամիս Պակիստանում կործանված Airbus A320 ինքնաթիռի օդաչուները բարդ վայրէջքի ժամանակ տարված են եղել կորոնավիրուսային թեմայի քննարկմամբ ու փորձել են վայրէջք կատարել օդանավի՝ դեռևս ծալված անիվներով: Այս են վկայում հետաքննության նախնական զեկույցի արդյունքները:
Պակիստանի միջազգային ավիաուղներին պատկանող օդանավը կործանվել էր մայիսի 22-ին՝ դառնալով 98 մարդու մահվան պատճառ: Օդանավը Կարաչիի օդանավակայանում վայրէջք կատարելու երկու անհաջող փորձ էր արել:
Պակիստանի ավիացիայի նախարարը խորհրդարանում ելույթի ժամանակ հայտարարել է, որ օդաչուները վայրէջքի ժամանակ քննարկելիս են եղել կորոնավիրուսի թեման և անջատել էին ինքնակառավարման համակարգը:
«Երկու օդաչուները կենտրոնացած չէին և ամբողջ ընթացքում խոսում էին կորոնայի մասին: Նրանց մտքում միայն վիրուսն էր: Նրանց ընտանիքները վարակված էին, և նրանք քննարկում էին այդ հարցը»,-ասել է նախարարը՝ հավելելով, որ օդաչուները չափից ավելի ինքնավստահ էին:
Կատարվածի վերաբերյալ նախնական զեկույցում ներկայացված են չվերթի վերջին քաոսային րոպեներն ու անձնակազմի թույլ տված տարօրինակ սխալները:
Քննիչները պարզել են, որ երբ օդաչուները փորձել են առաջին անգամ վայրէջք կատարել, դիսպետչերները նրանց խորհուրդ են տվել շտկել բարձրությունն ու ևս մի պտույտ կատարել ավելի աստիճանական վայրէջքի համար: Սակայն օդաչուները պտույտ անելու փոխարեն փորձել են ամեն գնով վայրէջք կատարել՝ չնայած, որ շասսին բարձրացված է եղել: Դիսպետչերը տեսել է՝ ինչպես են Airbus A320-ի շարժիչները դիպչում թռիչքուղուն, սակայն այդ մասին չի ասել օդաչուներին: Արդյունքում խիստ վնասված շարժիչներն արդեն շարքից դուրս եկած են եղել, երբ ինքնաթիռը երկրորդ վայրէջքի փորձ է արել: