ԱՄՆ-ն վիզային սահմանափակումներ է մտցրել չինացի պաշտոնյաների դեմ
ԱՄՆ-ն վիզային սահմանափակումներ է մտցրել Չինաստանի Կոմունիստական կուսակցության մի շարք անդամների համար՝ «Հոնկոնգի ինքնավարության և մարդու իրավունքների խախտման համար», հաղորդել է ԱՄՆ պետքարտուղար Մայք Պոմպեոն, գրում է Reuters գործակալությունը։
«Այսօր ես հայտարարում եմ Չինաստանի Կոմունիստական կուսակցության գործող և նախկին ներկայացուցիչների նկատմամբ վիզային սահմանափակումների կիրառման մասին, որոնք պատասխանատվություն են կրում կամ մեղսակից են Հոնկոնգի ինքնավարության քայքայմանը, որը երաշխավորված է 1984 թվականի բրիտանա-չինական համատեղ հռչակագրով», - հայտարարել է Պոմպեոն:
Պետքարտուղարը զգուշացրել է, որ այդ պաշտոնյաների ընտանիքների անդամները նույնպես կարող են ենթարկվել վիզային սահմանափակումների։ Պոմպեոն չի նշել կոնկրետ պաշտոնյաների անունները։
Նա հայտարարել է, որ վիզային սահմանափակումների հաստատումը«կատարում է նախագահ Թրամփի տված խոստումը՝ պատժել Չինաստանի Կոմունիստական կուսակցության ներկայացուցիչներին, որոնք պատասխանատու են Հոնկոնգի ինքնիշխանությունը խարխլելու համար»։