Մեքենաների ներմուծմամբ զբաղվող և 12 երեխա ունեցող անօթևան ընտանիքի հայրը կանգնած է 30 հազար եվրո պարտք կուտակելու վտանգի առաջ, դիմել է ՊԵԿ-ին, ասել են՝ ՍՊԸ-ներին չեն ընդառաջում (տեսանյութ)
Բեժանյանների 15 հոգանոց ընտանիքում 12-ը երեխաներ են, մեկը մյուսի համար հեքիաթ է կարդում, ամենամեծն ամենափոքրին՝ մի քանի ամսական Աննային է խնամում, մինչև մայրը խոհանոցում գործերն ավարտի, եթե, իհարկե, դա հնարավոր է:
Կորոնավիրուսի համավարակից հետո սոցիալական խնդիրները թակեցին նաև այս ընտանիքի դուռը: Ընտանիքի հայրն աշխատանքը կորցրեց, բավական չէ, դեռ վտանգ կա, որ 30 հազար եվրո պարտք կկուտակվի: Գեւորգ Բեժանյանը մեքենաների ներմուծմամբ էր զբաղվում, ընտանիքին ապահովում էր անհրաժեշտ ամեն ինչով, բայց ամեն ինչ փոխվեց, երբ պարզվեց, որ մեքենաների մաքսազերծումը նոր դրույքաչափերով պիտի անի:
«Քանի որ ՍՊԸ-ով է ներմուծվել ԵԱՏՄ-ն էլ թույլ չտվեց, բոլոր մեքենաներն արեցին 5 հատը մնաց: Խնդիրն այ է, որ այդ մեքենաների պատասխանատվությունն իմ վրա է, եթե դրանք ես գնել եմ հաճախորդների համար ու եթե այդ հարցը ես չլուծեմ, ապա մտնում եմ մոտ 30 հազար եվրո պարտքի տակ, իսկ ես այդպիսի դաստիարակություն չունեմ , որ այս հարցը թողնեմ ինքնահոսի»,- ասաց ընտանիքի հայրը՝ Գևորգ Բեժանյանը:
Գևորգն այս հարցով դիմել է ՊԵԿ-ին և պատկան այլ կառույցների, մերժել են, նամակ է ուղղել՝ հույսը չկորցնելով, որ դրական պատասխանի կարժանանա: Բայց Պետական եկամուտների կոմիտեից ասել են՝ օրենքը բոլորի համար նույնն է:
Ինչպես հայտնի է, 2020 թվականի հունվարի 31-ից փոխվեց իրավաբանական անձանց կողմից Եվրասիական տնտեսական միության անդամ չհանդիսացող երկրից միության տարածք ներմուծվող ավտոմեքենաների մաքսատուրքի դրույքաչափերը: Սակայն հունվարի կեսերին, երբ հասել էին Գևորգի մեքենաները, մաքսատանը պարզվել է, որ նախնական հայտարարագիրն այն մասին, որ մեքենաները պետք է հին դրույքաչափով մաքսազերծվեն՝ թյուրիմացաբար չի լրացվել:
«547 այդպիսի մեքենա է եղել, դրանց հարցը լուծել են, որովհետև ներմուծել են որպես ֆիզիկական անձ, իսկ մերը ՍՊԸ-ով ենք ներմուծել, իսկ որ ՍՊԸ-ով է ներմուծված, ԵՏՄ-ն թույլ չի տալիս, հիմա ստեղ հարցն այն է, որ դրա պատասխանատվությունն իմ վրա է, վարձով եմ ապրում, եթե տուն ունենայի, անպայման կվաճառեի ու կլուծեի այդ հարցը, խնդրում եմ, որ պետությունը սրան անդրադառնա անպայման»,-ասաց Գևորգ Բեժանյան:
Բեժանյանների ընտանիքը երկար տարիներ է՝ վարձով է ապրում: Վերջերս նրանց էր այցելել վարչապետի տիկին Աննա Հակոբյանը, խոստացել էր զբաղվել բնակարանի հարցով, ընտանիքը մինչեւ այս պահը հույսով սպասում է:
«Մեր մոտ սոցիալական խնդիր առաջացել է երբ ամուսինս իր աշխատանքը կորցրեց, մինչև այդ ոչ մի սոցիալական խնդիր չենք ունեցել, և մեր երեխաներին տեղը տեղին պահել ենք»,-ասաց Գոհար Բեժանյան
Գևորգը փոքրիկ բիզնեսի գաղափար ունի, ներկայացրել է բարերարներին, ու վստահ է, որ կհաջողի իր գործում: Բայց ասում է՝ քանի դեռ այս հարցը լուծված չէ, նա չի կարողանում այլ գործի վրա կենտրոնոնալ, այս պահին էլ աշխատանք է փնտրում՝ բազմանդամ ընտանիքի առօրյա հոգսերը հոգալու համար:
Մանրամասները՝ տեսանյութում