Ֆելիքս Ցոլակյանը գոհ է վերջին արտակարգ իրավիճակներում փրկարարների աշխատանքից
![Ֆելիքս Ցոլակյանը գոհ է վերջին արտակարգ իրավիճակներում փրկարարների աշխատանքից](https://gdb.rferl.org/61220e18-b6bb-49b8-b97b-db6102933511_w800_h450.jpg)
Արտակարգ իրավիճակների նախարար Ֆելիքս Ցոլակյանն ասում է` Արմավիր գյուղում գտնվող «Պռոշյանի կոնյակի գործարանի» հրդեհի, ապա և պայթյունի ժամանակ ԱԻՆ աշխատակիցները որակյալ աշխատանք են կատարել: Նախարարը գոհ է նաև Երևանի Ռայնիսի փողոցի շենքի փլուզման ժամանակ կատարված աշխատանքից:
Պայթյունի պատճառով Երևանի Քանաքեռ-Զեյթուն վարչական շրջանի Ռայնիսի 1 հասցեում գտնվող շենքի առաջին շքամուտքի պատշգամբային հատվածն ամբողջովին փլուզվել էր։ Ըստ արտակարգ իրավիճակների նախարարի՝ քառահարկ, պանելային շենքում 12 բնակարան է մասամբ փլուզվել։ Իսկ կոնյակի գործարանում 30 տոննա տարողությամբ ապակեպատ տարրան՝ ռեզերվուարն էր պայթել, ինչն էլ հրդեհի էր հանգեցրել։ Երկու դեպքում էլ զոհեր կային:
Հրայր Թամրազյանի «Կիրակնօրյա վերլուծականի» հյուրը նախարար Ֆելիքս Ցոլակյանն է:
«Պռոշյանի» գործարանի պայթյուն հրդեհը կարող էր տարածվել մյուս ցիստեռների վրա, հրշեջների աշխատանքի որակով կատարելու արդյունքում կարողացանք խուսափել տարածումից: Ժամանակին հասել են և կարողացել են կանխել ավելի մեծ աղետը, քան եղել է, բայց ցավոք սրտի չկարողացանք առանց զոհերի պրծնել, - ասաց նա` շարունակելով, - Եթե «Պռոշյանի» պարագայում ամբողջությամբ կատարելու հնարավորությունը կար, ապա շենքի դեպքում հնարավորությունները շատ սուղ էին, քանի որ մոտենալու, տեխնիկայի մոտենալու հնարավորությունները շատ քիչ էին: Փրկարարները գերազանց աշխատանք կատարեցին այնտեղ, և ես գոհ եմ իրենց աշխատանքից»:
Ֆելիքս Ցոլակյանն ընդգծեց` փրկրարները աշխատանքներ են կատարել նաև տավուշյան մարտերի ժամանակ. - «Տավուշում կրակների տակ հրդեհ էին հանգցնում հրշեջները»:
Ինչ վերաբերում է Covid-19-ի դեմ պայքարին, մասնավորապես քննադատություններին, թե կառավարությունն ավելի արդյունավետ կարող էր պայքարել համաճարակի դեմ, եթե հակահամաճարակային կանոնների պահպանմանը ամենայն խստությամբ հետևեին, նախարարն արձագանքում է, թե եթե-ներով հեշտ է խոսել և մեղավորներ փնտրել, և որ ոչ մեկը չի կարող ասել` ինչ պիտի լիներ, և ինչ կտար դա. - «Մեր նախարարության մասով եմ ուզում ասել, մենք առաջին օրվանից լծվել ենք այդ գործին, արտերկրից Երևան ժամանողներին ԱԻՆ աշխատակիցներն են մեքենաներով տեղափոխել, տեղավորել համապատասխան հյուրանոցներում, վայրերում, վարակազերծում կատարել: 140 հազար ախտահանում է կատարվել ԱԻՆ-ի կողմից, մենք հասանք նրան, որ չթողեցինք, որ ներում տարածում լիներ»:
Իսկ որքանո՞վ ենք պատրաստ աղետներին, այս հարցին պատասխանելով արտակարգ իրավիճակների նախարարը հիշեցրեց, թե ինչ խնդիրներ ունի կառույցը. - «Հիմնականը տեխնիկական միջոցների առկայության պակասն է, Երևանն ունի 12 փրկարարական ջոկատ, բայց պետք է լիներ 21-ը, այդ դեպքում դեպքի վայրերին ավելի մոտ են լինում ու ավելի շուտ են կարողանամում հասնել, չունենք ավտոսանդուղքներ, որոնք օգտագործվում են բարձրահարկ շենքերի համար, չունենք նաև օդային տրանսպորտ: Սրա հարցով զբաղվում ենք, վարչապետի հետ աշխատանքներ կան, միգուցե սրա հարցը լուծվի առաջիկայում:
Անտառների հետ կապված խնդիրներ ունենք, քանի որ անտառներում ճանապարհներ չունենք, տեխնիկային հասցնելու խնդիր կա»:
Հարցին, թե ԱԱԾ նախկին տնօրեն Արթուր Վանեցյանն ասում էր, որ Դուք եք երաշխավորել, որ ժամանակին նա դառնա ԱԱԾ աշխատակից, Ֆելիքս Ցոլակյանը պատասխանեց. - «Շատերը հարցնում են` Դուք երաշխավորե՞լ եք Ազգային անվտանգության տնօրեն նշանակելու համար, ես ասում եմ` չէ, առաջին մասը ճիշտ է, երկրորդ մասը սխալ է»:
Հաղորդումն ամբողջությամբ կարող եք դիտել ստորև.