ԱԱԾ-ն թողել է իշխանական ֆեյքերին, որոնք ատելություն և ստեր են տարածում, և ինչ -որ ֆեյքի հետ կապված բերման է ենթարկում մարդկանց, ովքեր պետության համար շատ բան են արել. Արսեն Բաբայան
Այստեղ եմ եկել, որպես իրավապաշտպան ի աջակցություն այն ընկերներին, որոնց անհիմն ապօրինի բերման են ենթարկել և իմ տեղեկություններով նաև ձերբակալություն կիրականացնեն. Ազգային անվտանգության ծառայության դիմաց Tert.am-ի հետ զրույցում նշեց «Հայրենիք» կուսակցության անդամ Արսեն Բաբայանն՝ անդրադառնալով Կարեն Բեքարյանին և այլ անձանց ԱԱԾ բերման ենթարկելու վերաբերյալ:
«Այս իշխանությանը թվում է, որ կարողանալու է վախի մթնոլորտ ստեղծել ՀՀ -ում և հատկապես վաղվա հանրահավաքից առաջ, բայց ժամանակն է, որ այս իշխանությունը և մասնավորապես Ադրբեջանի դեսպանը ՀՀ-ում, հասկանա, որ շատ ծիծաղելի է, որովհետև այստեղ ոչ մի տրամաբանություն չկա, ինչ- որ ֆեյքերի հետ կապված կասկածներ ու նման հիմար բաներ»,- նշեց նա:
Բաբայանը նշեց, որ որ բերման ենթարկվածներից մեկի նկատմամբ բիրտ ուժ է կիրառվել, նրան գետնին են տապալել և նկարահանել են. «Ասինքն հերթական անգամ Նիկոլին ինչ- որ բան են ցույց տալու, երևի նրա մոտ հետաքրքիր զգացմունքներ է առաջանում: Մի քիչ խելք, տրամաբանություն ունեցող մարդը պետք է հասկանար, որ այս գործողություններով ոչ միայն ոչ մի արդյունքի չի կարողանալու հասնել, այլ՝ հայ ժողովրդին իր դեմ ավելի է գրգռելու»:
Դիտարկմանը, թե Բեքարյանը պատերազմի ողջ ընթացքում գտնվել է Արցախում և այնտեղից լուսաբանել է և հիմա քրեական գործը կեղծ էջով կեղծ լուրեր տարածելն է, և ինչո՞ւ է այժմ Կարեն Բեքարյանը ԱԱԾ-ի ուշադրության կենտրոնում, Բաբայանը նշեց, որ ով ճանաչում է Կարեն Բեքարյանին շատ կզարմանա, որ կարելի էր նրան, որևէ մեղադրանքով հրավիրել ԱԱԾ։
«Շատ տարօրինակ է, որ ԱԱԾ-ն և իրավապահ մարմինները թողել են իշխանական ֆեյքերին, որոնք իսկապես ատելություն և ստեր են տարածում, ընդ որում՝ շատ վտանգավոր ստեր, թողել են դավաճանություն կատարած անձին, որի վերաբերյալ մեր իրավական մտքի գիգանտները Գլխավոր դատախազություն հաղորդում են ներկայացրել և այս ամեն ինչը թողել են և ինչ -որ ֆեյքի հետ կապված բերման են ենթարկում մարդկանց, ովքեր իրենց փորձով այնքան բան են արել այս պետության համար, որ Նիկոլի մտքով էլ անգամ չի կարող անցնել, որ այսքան բան կարելի է անել ՀՀ-ի համար: Դատախազությունը այս ընթացքում, ցույց տվեց, որ ամենաքաղաքականացված մարմինն է և ստում է դատախազը, երբ ասում է, թե հիմք կունենամ՝ կձերբակալեմ գլխավոր դավաճանին, բացահայտ ստում է, որովհետև հիմքերը բազմաթիվ են և առանց հիմքի բերման են ենթարկվում ընդդիմադիր հայացքներ ունեցող ապաքաղաքական մարդկանց՝ օրինակ Կարեն Բեքարյանը վաղուց քաղաքական կուսակցության անդամ չէ, քաղաքականությամբ չի զբաղվում ընդդիմադիր հայացքներ ունեցող, բարձր փորձագիտական կարողություններ ունեցող մարդ է»,-ասաց նա:
Արսեն Բաբայանը նշեց, որ ՀՀ-ում իրապահ համակարգը ծառայում է Նիկոլ Փաշինյանին և ծառայելու է այնքան ժամանակ, քանի դեռ նա իշխանության է. «Վաղը՝ ամսի 20-ին, ժամը15։00-ին Ազատության հրապարակում մենք պետք է վռնդենք այս դավաճան իշխանությանը․ ինչքան էլ մարդկանց ձերբակալի, միևնույն է՝ իր մոտ ոչինչ չի ստացվելու»: