Նիկոլ Փաշինյանը ժամանել է «Սուրմալու» առևտրի կենտրոն (լուսանկարներ)
ՀՀ վարչապետ Նիկոլ Փաշինյանը քիչ առաջ ժամանեց «Սուրմալու» առևտրի կենտրոնի տարածք, որտեղ օգոստոսի 14-ին տեղի է ունեցել պայթյուն:
Փաշինյանին դեպքի վայրում դիմավորել է Երևանի քաղաքապետ Հրաչյա Սարգսյանը։
Ինչպես տեղեկացնում են ՀՀ կառավարության տեղեկատվության ու հասարակայնության հետ կապերի վարչությունից, կառավարության ղեկավարին ուղեկցել են Երևանի քաղաքապետ Հրաչյա Սարգսյանը, Արտակարգ իրավիճակների նախարար Արմեն Փամբուխչյանը, ԱԻՆ փրկարար ծառայության տնօրեն Արմեն Գասպարյանը, Տեսչական մարմինների աշխատանքների համակարգման գրասենյակի ղեկավար Արթուր Ասոյանը:
Վարչապետ Փաշինյանին ներկայացվել են որոնողափրկարարական և հրդեհի մարման աշխատանքների ընթացքը:
Հիշեցնենք, որ երեկ՝ օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ «Սուրմալու» առեւտրի կենտրոնում տեղի է ունեցել պայթյուն։ Ըստ նախնական տվյալների՝ տեղի է ունեցել պայթյուն՝ հրդեհի բռնկմամբ։ Պայթյունի հետևանքով կա 5 զոհ, որից մեկի ինքնությունը պարզված չէ։ Վիրավոր է ավելի քան 60 մարդ, ևս 16-ը համարվում է անհետ կորած։
