Meta ընկերությունում այս շաբաթ խոշոր կրճատումներ են նախատեսվում
Մարկ Ցուկերբերգին պատկանող Meta Platforms ընկերությունը, որի մաս են կազմում է Facebook-ը, Messenger-ը, Instagram-ը, WhatsApp-ը և Oculus-ը, պետք է այս շաբաթ հայտարարի մեծ թվով ծառայողների աշխատանքից ազատելու մասին:
Ենթադրվում է, որ որոշումը կտարածվի հազարավոր աշխատակիցների վրա: Ըստ ընկերության տնտեսագետների, հաջորդ տարի ընկերության ծախսերը զգալիորեն կավելանան, ինչը կհանգեցնի մոտ 67 միլիարդ դոլարի կորստի արժեթղթերի շուկայում:
Ցուկերբերգը վերջերս արգելել է նոր ծառայողներ վարձել և կարգադրել է միջոցներ ձեռնարկել ծախսերը կրճատելու համար:
Meta-ի ցուցիչները շուկաներում թուլացել են, այդ ընկերության հիմնական մրցակիցը հիմա համարվում է TikTok չինական ընկերությունը:
Meta -ն մեծ գումարներ է տրամադրում «մետատիեզերքի» հայեցակարգի շրջանակներում «վիրտուալ իրականության» զարգացման ծրագրին:
Ցուկերբերգն ասել է, թե իր կարծիքով, մեկ տասնամյակ է անհրաժեշտ այդ ներդրումներից եկամուտ ստանալու համար:
Օրեր առաջ խոշոր կրճատումների մասին է հայտնել Իլոն Մասկի սեփականությունը դարձած Twitter ընկերությունը: