Սաակաշվիլիի փաստաբանը հայտարարել է, որ «ձերբակալելուց հետո նրան թունավորել են»
Վրաստանի նախկին նախագահ Միխեիլ Սաակաշվիլիի փաստաբանը հայտարարել է, որ ստացել է փորձաքննության արդյունքները՝ հաստատելով, որ ձերբակալվելուց հետո Սաակաշվիլին «թունավորվել է»։
Փաստաբանի խոսքով՝ դրանով են բացատրվում Սաակաշվիլիի առողջական խնդիրները, հաղորդում է «Նովոստի-Գրուզիա»-ն։
«Բոլոր հիվանդությունները, որոնք ունի Սաակաշվիլին, բոլոր ախտանշանները կարող են լինել այս թունավորման պատճառով: Նա ինքն էլ երկար ժամանակ կասկածում էր, որ թունավորված է, այլապես նրա հիվանդություններն այսպես չէին զարգանա»,- ասել է փաստաբան Վալերի Գելբախիանին։
Նրա խոսքով՝ փորձաքննության արդյունքները կհրապարակվեն երկու օրից, իսկ այս փուլում նա կարող է միայն ասել, որ եզրակացությունը պարունակում է Սաակաշվիլիի օրգանիզմում հայտնաբերված թունավոր նյութերի ցանկը։ Սաակաշվիլիի մայրը՝ Ջուլի Ալասանիան, ասել է, որ խոսքը ծանր մետաղների՝ սնդիկի, բարիումի, թալիումի պարունակության ավելացման մասին է։
Փաստաբանը հավելել է, որ լրացուցիչ ուսումնասիրություններ են անհրաժեշտ՝ պարզելու համար, թե երբ կարող էր թունավորումը տեղի ունենալ՝ կա՛մ քանի դեռ Սաակաշվիլին բանտում էր, կա՛մ Վիվամեդ կլինիկա տեղափոխվելուց հետո, որտեղ Սաակաշվիլին գտնվում էր վերջին մի քանի ամիսների ընթացքում։
Վրաստանի իշխանությունների ներկայացուցիչները դեռ չեն մեկնաբանել այս հայտարարությունը։ Ավելի վաղ Վրաստանի իշխանությունները բազմիցս ասել էին Սաակաշվիլիի առողջական տագնապալի վիճակի մասին հայտարարություններին ի պատասխան, որ դա առանձնապես անհանգստություն չի առաջացնում, և որ նա անհրաժեշտ օգնություն է ստանում կլինիկայում։
Նախկին նախագահի կողմնակիցներին կոչ են անում այս շաբաթ բողոքի ցույց անել՝ պահանջելով նրան տեղափոխել արտասահման բուժման։
Միխեիլ Սաակաշվիլին ձերբակալվել է Վրաստանում 2021 թվականի հոկտեմբերի 1-ին այն բանից հետո, երբ նա ութ տարվա մեջ առաջին անգամ վերադարձել է հայրենիք՝ մունիցիպալ ընտրությունների նախօրեին։
Վրաստանում նախկին նախագահը հեռակա դատապարտվել է վեց տարվա ազատազրկման։ Սաակաշվիլին իրեն առաջադրված մեղադրանքները անվանել է քաղաքական հետապնդում, իսկ իրեն՝ քաղբանտարկյալ։ Ձերբակալությունից անմիջապես հետո նախկին նախագահը հացադուլ է հայտարարել, իսկ նոյեմբերի 19-ին համաձայնել է դադարեցնել այն։ Սաակաշվիլին պնդում էր, որ իրեն կտտանքների են ենթարկել անազատության մեջ։ Երկարատև հացադուլից հետո կալանավորը գտնվում էր ծանր վիճակում և դրա պատճառով Ռուսթավիի բանտից տեղափոխվել է Գորիի զինվորական հոսպիտալ։
Դեկտեմբերի վերջին Սաակաշվիլին կրկին տեղափոխվել է Ռուսթավի թիվ 12 քրեակատարողական հիմնարկ։
Նոյեմբերի 8-ին հայտնի է դարձել, որ Վրաստանի երրորդ նախագահ Միխեիլ Սաակաշվիլին հիվանդ է տուբերկուլյոզով։