«Թող ադրբեջանցիները վերադառնան Հայաստան»՝ սա հաջորդ միտքն է, որին կընտելացնեն հասարակությանը. Արամ Աբրահամյան (տեսանյութ)
Թող ադրբեջանցիները վերադառնան Հայաստան, սա հաջորդ միտքն է, որին կընտելացնեն հասարակությանը։
«Կիզակետում Արկադի Գրիգորյանի հետ» հաղորդման ժամանակ ասել է «Առավոտ» թերթի գլխավոր խմբագիր, քաղաքական մեկնաբան Արամ Աբրահամյանը․
«Արցախը տանք, Հայաստանը պահենք բանաձևը սխալ է, քանի որ այդ դեպքում Հայաստանը չենք կարող պահել։ Իշխանությունն արդեն հասարակությանն ընտելացրել է մտքին, որ 120 հազար հայ յոլա կգնան ադրբեջանցիների հետ, դա մարդակերություն է, հասարակությունն արդեն համակերպվել է։ Հաջորդ միտքը, որին կընտելացնեն հասարակությանը՝ թող ադրբեջանցիները վերադառնան Հայաստան, չէ որ նրանք մինչև 90-ականների սկիզբ ապրում էին այստեղ։ Նույն կերպ հասարակությանը կհամոզեն, որ պետք է 5 անկլավ հետ տանք։ Սա կնշանակի Հայաստանի Հանրապետության վերջը։ Հիմա մենք գնում ենք դեպի պետության կործանում»,- ասել է Աբրահամյանը։
Նրա կարծիքով, եթե զորանոցի հրդեհից ժամեր անց վարչապետը վարկած է հնչեցնում, ապա դա կարող է ուղղորդել հետաքննությանը և հետաքննությունը պետք է հետագա փաստերը հարմարեցնի այդ վարկածին։
Իրավապահները չեն կարող ասել, որ երկրի առաջին դեմքը սխալվել է։ Աբրահամյանը սխալ է համարել Փաշինյանի այն միտքը, որ մեր ողբերգությունների հիմքում մեր ԴՆԹ-ն է։ Իսկ իշխանությունը մարսում է ամեն ինչ, կարող է խնջույքներ և հրավառություններ անել, քանի որ հասարակությունը չի դատապարտում։ Իրավապաշտպան հասարակական կազմակերպություններն, ըստ Արամ Աբրահամյանի, լուռ են, քանի որ ակտիվ մասնակցություն են ունեցել 2018-ի իշխանափոխությանը։
Հարցազրույցն ամբողջությամբ՝ տեսանյութում․