Հաջորդ շաբաթվանից կբացվեն Արցախի բոլոր դպրոցները. Կրթության նախարար
Ձմռան ցրտին Արցախում կրկին գազ չկա։ Ստեփանակերտից հաղորդում են, որ Ադրբեջանը երեկվանից հերթական անգամ խափանել է գազամատակարարումը։ Իսկ Հայաստանից Արցախ հասնող էլեկտրաէներգիայի միակ գիծը վնասված է հունվարի 9-ից։ Արցախում արտադրվող սահմանափակ ծավալի հոսանքը բնակիչներին հասանելի է ոչ միշտ։
Ջեռուցման ու սննդի բացակայության պատճառով դեկտեմբերի վերջից փակ են Արցախի մանկապարտեզները։
Դպրոցները մասամբ են բացվել։ Հիմնականում ավագ դասարանների համար, որ ավարտական փուլում են։ Բաց դպրոցներն էլ փայտե վառարաններով են ջեռուցվում։
Արցախի Կրթության նախարար Հասմիկ Մինասյանն «Ազատության» հետ զրույցում ասաց, որ մտադիր են հաջորդ շաբաթվանից բացել բոլոր դպրոցները. - «Ունենք փայտով ջեռուցվող դպրոցներ, և որտեղ երկրորդ հերթ ա ազատ, կամ նույն դպրոցներում, որտեղ վառարան ենք տեղադրել 9-12-րդ դասարանների համար, մենք երկրորդ հերթով նույն դպրոցների աշակերտներին փորձելու ենք բերել։ Եվ մոտակա օրերը երևի բոլոր դպրոցները արդեն կգործեն»։
Ադրբեջանցիները 67 օր է, շրջափակել են Արցախը, փակել աշխարհին կապող միակ ճանապարհը։ Հումանիտար ճգնաժամն օրեցօր սրվում է։
Բնությանն է հասել, կառավարության այսօրվա նիստում մտահոգվեց վարչապետ Փաշինյանը. - «Զուգահեռ ծավալվում է բնապահպանական ճգնաժամ, որովհետև Լեռնային Ղարաբաղի բնակչությունը բնակարանները տաքացնելու և այլ կենցաղային կարիքների համար ստիպված է փայտ օգտագործել, ինչի համար անտառներ են հատվում։ Սա, ըստ էության, անվիճարկելի ապացույցն է այն բանի, որ Լաչինի միջանցքի շրջափակման բնապահպանական մոտիվները մտացածին են, և Ադրբեջանի գործողությունները ունեն մի նպատակ՝ ավարտին հասցնել Լեռնային Ղարաբաղի հայությանը էթնիկ զտման ենթարկելու քաղաքականությունը»։
Ըստ Փաշինյանի, միջազգային հանրության համար էլ գնալով ակնհայտ է դառնում, որ ադրբեջանցիների բնապահպանական մտահոգությունները հորինված են. - «Պատահական չէ, որ Ցեղասպանության կանխարգելման Լեմկինի միջազգային ինստիտուտը Լաչինի միջանցքի ապօրինի շրջափակման և Ադրբեջանի ղեկավարության հռետորաբանության վերաբերյալ վերջին երեք ամսում երեք անգամ հայտարարությամբ է հանդես եկել։ Նմանօրինակ վերջին հայտարարության մեջ, որը հրապարակվել է 2023 թվականի հունվարի 18-ին, Լեմկինի ինստիտուտը համաշխարհային առաջնորդներին խնդրում է լրջորեն վերաբերվել Լեռնային Ղարաբաղում հայերի ցեղասպանության սպառնալիքին»։
Կարմիր խաչի ուղեկցությամբ երկու օր առաջ ուռուցքային ու սիրտ-անոթային համակարգի ծանր հիվանդություններով յոթ մարդ տեղափոխվել է Երևանի հիվանդանոցներ։ Երեք բուժվող վերադարձել Արցախ։ Արցախի բուժհաստատություններում պլանային վիրահատությունները դեռևս դադարեցված են, չորս երեխա վերակենդանացման բաժանմունքում է։