Փաշինյանը հիմա զբաղված է թուրքական նախապայմանների բավարարմամբ՝ նախապատրաստելով գերեզմանային խաղաղության դարաշրջանի բացմանը․ Անդրանիկ Թևանյան
Տեղի է ունեցել մեծ խաբեություն, « Քաղաքացիական պայմանագիր» կուսակցությունը և նրա առաջնորդը 2021թ-ի նախընտրական ծրագրով խոստացել են պաշտպանել Արցախի ժողովրդի ինքնորոշման իրացումը առանց սահմանափակումների, պայքարել ԼՂԻՄ տարածքների դեօկուպացիայի համար, հակամարտությունը կարգավորել Արցախի կարգավիճակի վերջնական հստակեցման տեսքով՝ «անջատում՝ հանուն փրկության» սկզբունքով։ Այս մասին հայտարարությունների ժամին ԱԺ-ում ունեցած ելույթում ասաց «Հայաստան» խմբակցության պատգամավոր Անդրանիկ Թևանյանը։
«ՔՊ-ն ասել է, որ Արցախի ժողովուրդը չի կարող գոյատևել Ադրբեջանի ենթակայության ներքո և որ Հայաստանը շարունակելու է լինել Արցախի ժողովրդի անվտանգության երաշխավորը։ Այսպիսի խոստումներ տալով՝ նրանք քվե են ստացել և փաստորեն խաբել։ Ի դեպ՝ այդ քվեին հղում անելով է Ալիևը հայտարարում, որ հայ ժողովուրդը ընտրել է Փաշինյանին, ուրեմն համաձայնել է անդադար զիջումների, այնինչ դա ոչ թե հայ ժողովրդի, այլ Փաշինյանի դիրքորոշումն է, որը լեգիտիմ չէ»,- ասաց Թևանյանը։
Նա ասաց, որ Նիկոլ Փաշինյանը հիմա անում է այն, ինչի համար քվե չի ստացել։
«Անում են իրենց ասածների հակառակը, վարում են Արցախն Ադրբեջանին հանձնելու քաղաքականություն, հակադրում 120․000 արցախցուն 3 մլն հայաստանցու հետ՝ ներազգային ռասիզմ և թշնամանք, մարդակերություն սերմանելով։ 2022թ-ի հոկտեմբերի 6-ի Պրահայում Փաշինյանն ընդունել է, որ Արցախն Ադրբեջանինն է, ինչը դարձել է Ալիևի կողմից Լաչինի միջանցքը փակելու պատճառներից մեկը։ Պրահյան համաձայնությունները Փաշինյանը հաստատել է Մյունխենում տեղի ունեցած հակահայ դավադրության շրջանակներում։ Իշխող ուժը առաջնորդվում է Ղարաբաղը Ադբեջան է և վերջ կարգախոսով, ինչին հաջորդել է Ալիևի՝Հայաստանն Արևմտյան Ադրբեջան է և վերջ ծրագրի հռչակումը։ ՔՊ-ն խաբել է նաև հայ-թուրքական հարաբերություննրի հարցում՝ հայտարարելով, որ դրանք առանց նախապայմանների են, սուտ է, կան նախապայմաններ ու դրանց մասին Անկարան բաց խոսում է։ Փաշինյանը հիմա այդ նախապայմանների բավարարմամբ է զբաղված՝ նախապատաստելով գերեզմանային խաղաղության դարաշրջան»,- ընդգծեց պատգամավորը։
Թևանյանը ավելացրեց, որ Փաշինյանը ստել է հայ-ռուսական հարաբերությունների հարցում։
«Նա խոստացել է ռազմավարական դաշինքի խորացում, բայց միացել է հակառուսական կոալիցիային ու հակառուսական հիստերիա բարձրացրել մեզ մոտ՝ Հայաստանը դարձնելով Արևմուտք-ՌԴ բախման թատերաբեմ»,- ասաց պատգամավոր Անդրանիկ Թևանյանը։