2022-ի վերջին Արթուր Դավթյանը 18,2 մլն դրամ է ստացել մրցելույթների համար, 10 մլն՝ աշխարհի չեմպիոնի, 3,2 մլն՝ Եվրոպայի փոխչեմպիոնի կոչման համար, 5 մլն՝ որպես 10 լավագույն մարզիկներից մեկը. ԿԳՄՍ նախարար
Օլիմպիական խաղերի բրոնզե մեդալակիր, աշխարհի ու Եվրոպայի չեմպիոն Արթուր Դավթյանը երկրորդ ոսկե մեդալն է նվաճել Դոհայում անցկացված սպորտային մարմնամարզության առանձին գործիքների աշխարհի գավաթի խաղարկության երկրորդ փուլում։
Այս մասին ֆեյսբուքյան իր էջում գրել է ԿԳՄՍ նախարար Ժաննա Անդրեասյանը՝ տեղեկացնելով, որ նախորդ տարեվերջին Արթուր Դավթյանը 18,2 մլն դրամ է ստացել իր փայլուն մրցելույթների համար, 10 մլն դրամ՝ աշխարհի չեմպիոնի կոչումը նվաճելու համար, 3,2 մլն դրամ՝ Եվրոպայի փոխչեմպիոն հռչակվելու համար, 5 մլն դրամ՝ որպես տարվա 10 լավագույն մարզիկներից մեկը։
«Բացի դրանից՝ հաջող մրցելույթների համար, ինչպես նաև Փարիզի օլիմպիական խաղերին պատշաճ պատրաստվելու համար մարզիկը ստանում է ամենամսյա վճարներ՝ ավելի քան մեկ միլիոն դրամ։
Խրախուսման այս քաղաքականությունը գործում է նման հաջողություններ գրանցող մեր բոլոր մարզիկների համար՝ նպատակ ունենալով ստեղծել պայմաններ՝ միայն իրենց մարզավիճակի վրա կենտրոնանալու և լավ արդյունքներ գրանցելու համար։
Ամեն անգամ, երբ մեր մարզիկները հաջողություն են գրանցում, ավելանում են այդ մարզաձևով զբաղվել ցանկացող երեխաները՝ ցանկանալով նմանվել մարզիկներին։ Դրանով մեր մարզիկները ոգևորում են մեր երեխաներին, նրանց առաջ մղում դեպի իրենց երազանքներն ու նպատակները»,- գրել է նախարարը: