Գարեգին Բ-ն, ըստ ռուս հոգևորականի, դատապարտել է պատրիարք Կիրիլի դեմ պատժամիջոցները
Ամենայն Հայոց կաթողիկոսը խստորեն դատապարտել է Մոսկվայի և Համայն Ռուսիո պատրիարք Կիրիլի դեմ մի շարք երկրների կողմից կիրառված պատժամիջոցները:
Ազատության հաղորդմամբ ՏԱՍՍ-ին՝ Գարեգին Երկրորդի հետ հանդիպումից նման մանրամասներ է փոխանցել Ռուս Ուղղափառ եկեղեցու Երևանի թեմի ժամանակավոր կառավարիչ, Կլինսի մետրոպոլիտ Լեոնիդը։
Ըստ աղբյուրի՝ ռուս հոգևորականը մի քանի օր առաջ Հայաստան է այցելել։ Երկուշաբթի օրը հանդիպել է Ամենայն Հայոց Գարեգին Բ կաթողիկոսի հետ։ Հանդիպման մասին Մայր Աթոռը չի հաղորդել։
Ռուս Ուղղափառ եկեղեցու Երևանի թեմի ժամանակավոր կառավարչի խոսքով՝ նրանք նաև կարևորել են Ռուսաստանի, Հայաստանի և Ադրբեջանի հոգևոր առաջնորդների միջև եռակողմ համագործակցությունը տարածաշրջանում խաղաղության հաստատման համար։
Երեք երկրների հոգևոր առաջնորդները՝ Պատրիարք Կիրիլը, Ամենայն Հայոց Կաթողիկոս Գարեգին Երկրորդը և Կովկասի մահմեդականների գրասենյակի ղեկավար Ալլահշուքյուր Փաշազադեն մի քանի անգամ հանդիպել են։ Երեք երկրների հոգևոր առաջնորդները, ի թիվս այլ հարցերի, քննարկել են Լեռնային Ղարաբաղի կարգավորման հարցը։