ԱՄՆ-ն և Բրազիլիան քննարկել են պատերազմն Ուկրաինայում
Միացյալ Նահանգների նախագահի՝ ազգային անվտանգության հարցերով խորհրդական Ջեյք Սալիվանը երեքշաբթի զրուցել է Բրազիլիայի նախագահի գլխավոր խորհրդական Սելսու Ամորիմի հետ այն բանից հետո, երբ այդ երկրի նախագահ Լուիս Ինասիու Լուլա դա Սիլվան Չինաստան կատարած այցի ընթացքում ԱՄՆ-ին մեղադրել էր Ուկրաինայում «պատերազմը խրախուսելու» համար: Այս մասին գրել է Bloomberg-ը:
Սպիտակ տան տարածած մամուլի հաղորդագրության համաձայն՝ Սալիվանը և Ամորիմը «քննարկել են մի շարք երկկողմ և գլոբալ հարցեր, ներառյալ Ռուսաստանի պատերազմն Ուկրաինայի դեմ» ու «շարունակական համագործակցությունը կլիմայի փոփոխության դեմ պայքարելու և շրջակա միջավայրը պաշտպանելու համար»:
Հանգստյան օրերին Պեկին կատարած այցելության ընթացքում Լուլան լրագրողներին ասել էր, թե «կարևոր է, որ ԱՄՆ-ն դադարի խրախուսել պատերազմը և սկսի խոսել խաղաղության մասին»:
Բացի այդ, Բրազիլիայի արտաքին գործերի նախարար Մաուրու Վիեյրան երկուշաբթի օրը ՌԴ արտգործնախարար Սերգեյ Լավրովի հետ հանդիպումից հետո ասել էր, որ Ռուսաստանի նկատմամբ կիրառված տնտեսական պատժամիջոցներն անհարկի վնաս են հասցնում այն երկրներին, որոնք ներգրավված չեն ռուս-ուկրաինական հակամարտությունում: Երեքշաբթի օրն ԱՄՆ պետքարտուղար Էնթոնի Բլինկենը հրաժարվել էր անդրադառնալ Լուլայի նկատառմանը, և միայն ասել, որ Բրազիլիայի առաջնորդը «լավ հանդիպում» է ունեցել ԱՄՆ նախագահ Ջո Բայդենի հետ փետրվարին Սպիտակ տանը: