Արցախում նախորդ տարվա համեմատ ՃՏՊ-ների և դրանց հետևանքով զոհերի թիվն աճել է

Ինչպես  տեղեկացնում են Արցախի Հանրապետության Ներքին գործերի նախարարությունից՝  այս մասին նշել  է ճանապարհային ոստիկանության պետ փոխգնդապետ Կարեն Ծատրյանը ոստիկանության պետ գնդապետ Արտյոմ Հարությունյանին  այսօր  ներկայացնելով  հաշվետվության՝ 2023 թվականի 1-ին եռամսյակի օպերատիվ ծառայողական գործունեության արդյունքների վերաբերյալ:

Հաշվետու ժամանակահատվածում տեղի ունեցած ճանապարհատրանսպորտային պատահարների հետևանքով զոհվել է 4 և վիրավորվել՝ 18 մարդ (նախորդ տարվա նույն ժամանակահատվածում 14 պատահար և 22 վիրավոր) : Ըստ բերված տվյալների հանրապետության տարածքում ճանապարհատրանսպորտային պատահարների թիվը նախորդ տարվա համեմատ աճել է 3-ով, զոհերի թիվն աճել է 4-ով, վիրավորների թիվը նվազել է 4-ով:

Գրանցված ճանապարհատրանսպորտային պատահարների վերլուծությունը ըստ շրջանների ցույց է տալիս, որ պատահարների նվազում է գրանցվել Ասկերանի և Շուշիի շրջաններում՝ մեկական դեպքով: Աճել է Ստեփանակերտ քաղաքում 4 դեպքով և Մարտակերտի շրջանում 1 դեպքով: Նույնն է մնացել Մարտունու շրջանում:

Գրանցված ճանապարհատրանսպորտային պատահարներից 4-ը տեղի է ունեցել միջպետական, հանրապետական և տեղական նշանակություն ունեցող ճանապարհներին, որոնց հետևանքով զոհվել է 4 և վիրավորվել 5 մարդ, նախորդ տարվա 7 պատահարի և 11 վիրավորի դիմաց, իսկ 13-ը, որոնց հետևանքով զոհ չկա և վիրավորվել 13 մարդ, տեղի է ունեցել այլ քաղաքներում և բնակավայրերում, նախորդ տարվա 7 պատահարի և 11 վիրավորի դիմաց:

Նախորդ տարվա նույն ժամանակահատվածի համեմատ 4 դեպքով ավելացել է հետիոտնի վրաերթ բնութագրմամբ պատահարները: Գրանցված 8 պատահարի դեպքով վիրավորվել է 8 քաղաքացի:
Ճանապարհատրանսպորտային պատահարների առաջացման պատճառների վերլուծությունը ցույց է տալիս, որ գրանցված պատահարներից 1-ը տեղի է ունեցել վարորդի ոչ սթափ վիճակում տրանսպորտային միջոց վարելու պատճառով, 16-ը` վարորդների անուշադրության և ՃԵԿ-ի այլ խախտումների պատճառով:

Հաշվետու ժամանակահատվածում 160-ով նվազել է նյութական վնասով ճանապարհատրանսպորտային պատահարների քանակը` 104 պատահար,  նախորդ տարվա 264-ի փոխարեն:

Ճանապարհատրանսպորտային պատահարների վերլուծության արդյունքների հիման վրա ճանապարհապարեկային ծառայության հիմնական ուժերն ու միջոցները կենտրոնացվել են ճանապարհների և փողոցների՝ առավել մեծ քանակությամբ ճանապարհատրանսպորտային պատահարներով և երթևեկության ինտենսիվությամբ հատվածներում:

Ճանապարհային երթևեկության անվտանգության բնագավառի և ճանապարհային երթևեկության կանոնների խախտումներով երթևեկող տրանսպորտային միջոցներ հայտնաբերելու նպատակով ճանապարհային ոստիկանության ճանապարհապարեկային ծառայության սպայական գումարտակի ուժերով իրականացվել է 12 ստուգայց (ուժեղացված ծառայություն), որի ընթացքում հայտնաբերվել և արձանագրվել է 101 իրավախախտում:

2023 թվականի 1-ին եռամսյակի ընթացքում ի հայտ են բերվել 119 անսթափ վարորդ, որոնցից 16-ը զրկվել են տրանսպորտային միջոցներ վարելու իրավունքից, 28 վարչական վարույթ կարճվել է, 4 վարույթ գտնվում է ընթացքի մեջ:

Ճանապարհային անվտանգ երթևեկությանը նպաստող բաղկացուցիչ գործոններից է հանդիսանում ճանապարհների թողունակության կարողությունը:

Իրականացվել է ավտոմոբիլային ճանապարհների և փողոցների տեխնիկական վիճակի 7 հետազոտություն, որոնց արդյունքներով հայտնաբերված թերությունները վերացնելու համար քաղաքաշինության նախարարություն և տեղական ինքնակառավարման մարմիններին ուղարկվել են համապատասխան գրություններ՝ ճանապարհահատվածներում, կամուրջներում առկա վտանգավոր փոսերը և խորդուբորդությունները վերացնելու, համապատասխանաբար կահավորելու և վերանորոգելու համար:

Ոստիկանության պետ գնդապետ Արտյոմ Հարությունյանը բավարար գնահատելով ՃՈ ծառայողների կողմից առաջին եռամսյակում կատարված աշխատանքը, հանդիպման ավարտին տվել է մի շարք հանձնարարականներ՝ ճանապարհատրանսպորտային պատահարների կանխարգելման, ճանապարհային անվտանգ երթևեկության կազմակերպմանն ուղղությամբ: