Լենցովի՝ Բաքվում բանակցությունների արդյունքներով դրական փոփոխության հասնել չի հաջողվել. Արցախի պետնախարար
Արցախում ռուս խաղաղապահների ղեկավար Լենցովի գլխավորությամբ Բաքվում կայացած քննարկումներում հաջողության հասնել չի հաջողվել: Այս մասին հայտնել է Արցախի պետնախարար Գուրգեն Ներսիսյանը:
«Սիրելի հայրենակիցներ,
Ինչպես արդեն հայտնի է, Արցախում ռուսական խաղաղապահ զորակազմի հրամանատարությունը գեներալ գնդապետ Ա.Լենցովի գլխավորությամբ այս շաբաթվա ընթացքում այցելել էր Բաքու և ադրբեջանական կողմի հետ քննարկել Արցախում ստեղծված իրավիճակը:
Քննարկումների արդյունքներով իրավիճակի դրական փոփոխության և 2020թ. նոյեմբերի 9-ի եռակողմ հայտարարությամբ նախատեսված պայմանների վերականգնման շուրջ պայմանավորվածության հասնել չի հաջողվել:
Ամենակարճ ժամկետում նախատեսվում է նոր հանդիպում, որի արդյունքների մասին կտեղեկացնենք լրացուցիչ», - ֆեյսբուքյան էջում գրել է նա:
Հիշեցնենք, որ Արցախում տեղակայված ռուս խաղաղապահ զորախմբի նորանշանակ հրամանատար Ալեքսանդր Լենցովը բանակցություններ անցկացնելու նպատակով Բաքու էր մեկնել, որտեղ հանդիպել էր Ադրբեջանի ՊՆ ղեկավար Զաքիր Հասանովի հետ։ Նշվում է, որ հանդիպմանը քննարկվել էր օպերատիվ իրավիճակը Արցախում։
Հիշեցնենք, որ ապրիլի 23-ին Բաքուն ապօրինի անցակետ է տեղադրել է Լաչինի միջանցքում՝ ռուս խաղաղապահների պատասխանատվության գոտում, և հրաժարվում է այն հեռացնել։