Իրանի ԱԳՆ-ն հերքել է Թեհրանի կապն Ադրբեջանում լրտեսության համար ձերբակալվածների հետ
Իրանի ԱԳՆ-ն մեկնաբանել է Ադրբեջանում, իբր, Թեհհրանի համար լրտեսությամբ զբաղվող քաղաքացիների ձերբակալման մասին տեղեկությունները: Այս մասին գրում է tasnimnews.com-ը:
«Ցավոք, Ադրբեջանի Հանրապետության կառավարությունը որոշ ժամանակ է ձերբակալում և անազատության մեջ է պահում իր քաղաքացիներին իրանական կառույցների հետ կապերի մեղադրանքով և կեղծ մեղադրանքով», - հինգշաբթի ասել է Իրանի ԱԳՆ խոսնակ Նասեր Քանանին՝ հերքելով Ադրբեջանի՝ Իրանին ուղղված «շղթայական մեղադրանքները։
Խոսնակը կտրականապես հերքել է Իրանի և վերջերս ձերբակալված այդ քաղաքացիների միջև որևէ կապ:
Քանանին նշել է, որ յուրաքանչյուր կառավարություն ունի օրինախախտ քաղաքացիների դեմ գործողություններ ձեռնարկելու ներհատուկ իրավունք, սակայն հասկացնել է տվել, որ Բաքվի քայլը՝ բազմաթիվ քաղաքացիների ձերբակալելու և բանտարկելու՝ Իրանի հետ կապի մասին մեղադրանք ներկայացնելու միջոցով, անթույլատրելի և անընդունելի է։
Ադրբեջանի Հանրապետության ներքին գործերի նախարարությունը, անվտանգության ծառայությունը և գլխավոր դատախազությունը երեքշաբթի համատեղ հայտարարության մեջ նշել են, որ առնվազն ինը ադրբեջանցի քաղաքացի է ձերբակալվել՝ կասկածվելով «իրանական գաղտնի ծառայությունների հետ կապ ունենալու և հեղաշրջման ու սպանությունների նախապատրաստման համար»։