Լոնդոնում կյանքից հեռացել է Մեծ Բրիտանիայի ամենահարուստ ընտանիքի գլուխը
Լոնդոնում 87 տարեկանում կյանքից հեռացել է Շրիխանդ (Շրի) Հինդուջան՝ Մեծ Բրիտանիայի ամենահարուստ ընտանիքի գլուխը և Hinduja Group կոնգլոմերատի նախագահը. տեղեկությունը հաստատել է նրա ընտանիքը, գրում է The Guardian-ը:
Ըստ տեղեկությունների՝ միլիարդատերը դեմենցիա ուներ:
Հինդուջա ընտանիքը 2022 թվականին գլխավորել է Sunday Times Rich List-ը, այն բանից հետո, երբ նրանց ընդհանուր կարողությունն աճել է ավելի քան 11 միլիարդ ֆունտով՝ հասնելով 28,4 միլիարդ ֆունտի, ինչը տվյալ ցանկում ավելի քան երեք տասնամյակի ընթացքում կարողության գրանցված ամենամեծ ցուցանիշն է:
Մինչ իր մահը Շրին իր եղբոր՝ Գոպիի հետ գլխավորում էր ընտանեկան դինաստիան, որն աշխատանքով է ապահովում 150 000 մարդու։
Այս ընտանիքի քույրերն ու եղբայրներն իրենց կարիերան սկսել են Հնդկաստանում, բայց 1970-ականներից սկսած ժամանակի մեծ մասն անցկացրել են Մեծ Բրիտանիայում: Շրին եղբոր հետ համեմատաբար փոքր ընտանեկան ձեռնարկությունից ստեղծել է Hinduja Group-ը՝ այն վերածելով ընկերության, որը գործունեություն է ծավալում 38 երկրում՝ ընդգրկելով ոլորտներ, ներառյալ ավտոմոբիլային արդյունաբերությունը, նավթը, բանկային համակարգը, մեդիան և առողջապահությունը:
Եղբայրների հանգուցյալ հայրը՝ Պարմանանդը, գորգերի, թեյի և համեմունքների առևտուրը սկսել է 1914 թվականին, այն ժամանակվա բրիտանական Հնդկաստանի մի մասում (այժմ Պակիստան)։ Հետագայում նա բիզնեսը տեղափոխել է Իրան։