Բոլոր մանուկները պետք է ապրեն անվտանգ և խաղաղ երկրում. Երվանդ Թարվերդյանը երեխաների պաշտպանության միջազգային օրն անցկացրեց փոքրիկների հետ
«Միացյալ Հայաստան» կուսակցության հիմնադիր-նախագահ Երվանդ Թարվերդյանը հունիսի 1-ը՝ երեխաների պաշտպանության միջազգային օրն, անցկացրեց փոքրիկների հետ: Օրվա առթիվ Երվանդ Թարվերդյանն այցելեց «TMM - Սովորեցրու Ինձ Ավելին» ուսուցման և զարգացման կենտրոն:
«Միացյալ Հայաստան» կուսակցության անդամները պարբերաբար այս կենտրոնում են լինում, հետաքրքրվում երեխաների կարիքներով և փորձում այդ խնդիրները լուծել: Այսօրվա այցն էլ պատահական չէ և եկել են նրանց տոնը շնորհավորելու:
Թարվերդյանն ասում է՝ երեխաները մշտապես ուշադրության կարիք ունեն, իսկ աուտիզմ ունեցող փոքրիկները ամեն օր պետք է հոգածության ներքո գտնվեն:
«Պետք է նրանց հետ աշխատել, որպեսզի նրանք բացվեն և ինտեգրվեն հասարակության մեջ: Ասեմ մեկ պատմական փաստ. հանճարների մի ահռելի մաս աուտիզմով տառապող երեխաներ են եղել, իսկ հետագայում տարբեր ոլորտներում հանճարներ են դարձել»,- հավելեց նա:
Այստեղ ուսում ստացող 16 տարեկանից բարձր սաները սովորելուն զուգահեռ նաև միկրոբիզնեսով են զբաղվում, անձեռոցիկներ են պատրաստում: Ըստ Թարվերդյանի՝ սա կարևոր քայլ է, որ երեխաների մոտ նաև բիզնես-մտածողությունն է զարգանում:
«Մեր կյանքում ամեն մի հայ իր տեղը պետք է ունենա, մենք ավելորդ հայ չունենք: Այսօր ազգը համախմբված երեխաների պաշտպանության միջազգային օրն է նշում: Իմիջիայլոց, հենց երեկ իմ ընկերների հետ խոսում էինք այս թեմայով՝ վերհիշելով մեր ազգային տոները: Մենք պետք է պարտադիր մեր ազգային տոները նշենք:
Ինչու ոչ, մենք պետք է նաև նախաձեռնությամբ հանդես գանք, որ կառավարությունը մեր ազգային տոները նշի: Այո, ագրեսիա, պատերազմական գործողություններ դա պետք է գիտակցենք, սակայն, ազգը պետք է նաև ուրախանա և տոնի այն, ինչ իրենն է»,- ասաց նա:
«TMM - Սովորեցրու Ինձ Ավելին» ուսուցման և զարգացման կենտրոն մոտ 200 երեխաներ են հաճախում, ովքեր ունեն շտկողական աշխատանքների կարիք: Աշխարհագրությունը լայն է, կենտրոն հաճախում են հանրապետության տարբեր մարզերից խնդիրներ ունեցող երեխաները: Հատուկ մասնագետների խումբը փորձում են անհատական և խմբային աշխատանքների միջոցով շտկել երեխաների խնդիրները:
«Մեր երեխաները կարողանում են զարգանել, շփվել, խոսել, հասկանալ: Եվ մեր նպատակն է ստեղծել իսկական ներառական կրթություն և, երեխաներին ինտեգրել հասարակությանը»,-նշեց կենտրոնի տնօրեն Լենա Հարությունյանը:
Տնօրենի ներկայացմամբ՝ կենտրոնը մշտապես տարբեր հասարակական կազմակերպությունների, հասարակական- քաղաքական գործիչների ուշադրության կենտրոնում է:
«Ես չեմ ուզում, որ այս երեխաները հանրությունից առանձնանան: Ես ցանկանում եմ, որ նրանց չհիշեն միայն հունիսի մեկին, այլ որ յուրաքանչյուր օր հունիսի 1 լինի: Այս երեխաների առանձնահատկություններին չպետք է նայենք, պետք է չնկատենք նրանց խնդիրները: Բոլորս էլ ունենք առանձնահատկություններ և պետք է բոլորիս համար հասարակությունը մեկը լինի»,- մատնանշեց կենտրոնի տնօրենը:
Լենա Հարությունյանը օրվա առթիվ երեխաներին մեկ մաղթանք ունի, որպեսզի նրանք առողջ ու խաղաղ երկրում ապրեն:
Տոնի առթիվ կենտրոն այցելած 5 երեխաների հայր Երվանդ Թարվերդյանն էլ ցանկանում է, որ բոլոր մանուկները լավ պետություն ունենան, ապրեն անվտանգ և խաղաղ երկրում, քանի որ միայն խաղաղ հայրենիք ունենալու դեպքում կարող ենք զարգացում ունենալ: