Իրանն ու Լատինական Ամերիկայի երկրները կիսում են հեգեմոնիայի դեմ դիրքորոշումները․ Էբրահիմ Ռաիսի
Ողջունելով Իրանի և Լատինական Ամերիկայի «անկախ երկրների միջև ռազմավարական կապերը»՝ Իրանի նախագահ Էբրահիմ Ռաիսին ասել է, որ Իսլամական Հանրապետությունը նրանց հետ ընդհանրություն ունի՝ հեգեմոն տերությունների դեմ դիմադրության ոգին: Այս մասին գրել է Tasnim գործակալությունը։
Իրանի նախագահը երկուշաբթի առավոտյան Թեհրանից մեկնել է Կարակաս՝ եռակողմ շրջագայության Լատինական Ամերիկայով՝ Վենեսուելա, Նիկարագուա և Կուբա:
Թեհրանի օդանավակայանում լրագրողների հետ զրույցում Ռաիսին ասել է, որ Լատինական Ամերիկայի երկրների մեծամասնությունը ցանկանում է ապրել անկախ, կիսում է ազատության, անկախության ու հեգեմոն համակարգի դեմ դիմադրելու ոգին, բարեկամական հարաբերություններ ունենալ Իրանի հետ:
Ողջունելով Իրանի և Լատինական Ամերիկայի անկախ պետությունների միջև ռազմավարական կապերը՝ Ռաիսին ասել է. «Իրանի Իսլամական Հանրապետության և Վենեսուելայի, Նիկարագուայի և Կուբայի ընդհանուր դիրքորոշումը հեգեմոն համակարգի դեմ դիմադրությունն է և միակողմանիությանը (ունիլատերալիզմ - Tert.am) հակազդելը»։