Կոնկրետ օր, ժամ, տեղ այս պահին չեմ կարող ասել, բայց կազմակերպելու ենք ժողովրդի ընդվզումը և համաժողովրդական ճակատի ստեղծումը․ Իշխան Սաղաթելյան
Եթե ստորագրվի այն, ինչի մասին խոսել է Նիկոլ Փաշինյանը, լինելու է ոչ թե խաղաղության պայմանագիր, այլ նոր կապիտուլյացիա և ունենալու է աղետալի ու ողբերգական հետևանքներ հայ ժողովրդի համար։
Այս մասին ՀՅԴ ԳՄ մամուլի ասուլիսի ժամանակ ասաց ԳՄ ներկայացուցիչ Իշխան Սաղաթելյանը։
Վերջինս ընդգծեց, որ վերը նշվածը կանխելու միակ ճանապարհը համաժողովրդական ընդվզման ու դիմադրության ճակատի ձևավորումն է։
«Մեր գլխավոր խնդիրը հիմա ամեն ինչ անելն է, որ այդ փաստաթուղթը չստորագրվի, դրա համար պետք է կազմակերպենք ժողովրդի ընդվզումը, ժողովրդին դուրս բերենք պայքարի։ Մեր առաջիկա քայլերն ու գործողությունները ուղղված են լինելու դրան։ Եթե մեր երկրի ներսում չլինի դիմադրություն, եթե օրվա իշխանությունը հասկանա, որ կարող է ստորագրել այդ փաստաթուղթը և մարսի, ապա իրենք ստորագրելու են։
Ակնհայտ է, որ Նիկոլ Փաշինյանի ու Ալիևի միջև կա հստակ պայմանավորվածություն այս տարվա ընթացքում այդ գործընթացը ավարտին հասցնելու վերաբերյալ»,- ասաց Իշխան Սաղաթելյանը։
Հարցին՝ ինչպե՞ս են պատրաստվում կազմակերպել համաժողովրդական ընդվզումը և կա՞ն հստակեցված ժամկետներ, Սաղաթելյանը պատասխանեց․
«Մենք այս մասին նոր չէ, որ խոսում ենք, պարզապես Գերագույն ժողովը այս պահանջը հստակ դրել է։ Ունենք քայլերի ու գործողությունների մեր պատկերացումները, բայց քանի որ գտնում ենք, որ սա մեկ քաղաքական ուժի կամ կազմակերպության խնդիր չէ, մեր բոլոր գաղափարները քննարկելու ենք ՀՀ խորհրդարանական ու արտախորհրդարանակն բոլոր առողջ ուժերի հետ, ամբողջացնելու ենք այս ամեն ինչը ու դուրս գանք պայքարի։ Կոնկրետ օր, ժամ, տեղ այս պահին չեմ կարող ասել, բայց, որ ամբողջ ուժերով լծվելու ենք այս գործին, արդեն հայտարարել ենք դրա մասին»։
Սաղաթելյանը հնարավոր է համարում ստեղծված իրավիճակում ժողովրդի մոբիլիզացումը և համաժողովրդական ճակատի ստեղծումը։
«Հայ մարդը չի կարող համակերպվել այս իրավիճակին, յուրաքանչյուր մարդ պետք է տեր կանգնի իր հայրենիքին։ Մենք, այո, մեծ խնդիր ունենք մարդկանց՝ սպասվող աղետի բոլոր սպառնալիքները լիարժեք բացատրելու։ Վստահ եմ, եթե դա կարողանանք իրականացնել, մարդկանց կմղենք պայքարի։ Անցնող երեք տարիների ընթացքում մեր հիմնական անհաջողությունների պատճառը եղել է այն, որ չենք կարողացել մեր ժողովրդին լիարժեք բացատրել սպասվող աղետի մասին ու դուրս բերել պայքարի»,- ընդգծեց ՀՅԴ ԳՄ ներկայացուցիչը։