ՀՀ–ում Հնդկաստանի դեսպանությունը կապի մեջ է Երասխում վիրավորված հնդիկների հետ
Բեկորային վիրավորումներ ստացած տղամարդկանց վիրահատել են, նրանց կյանքին վտանգ չի սպառնում։
Հայաստանում Հնդկաստանի դեսպանությունը կապի մեջ է այսօր Երասխում ադրբեջանական կրակոցներից վիրավորում ստացած երկու հնդիկների հետ։ Sputnik Արմենիայի հետ զրույցում տեղեկությունը հայտնեցին դեսպանությունից։
Ավելի վաղ Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ արձակված ադրբեջանական կրակոցներիի հետևանքով վիրավորում են ստացել գործարանի կառուցման շինարարական աշխատանքներում ներգրավված Հնդկաստանի քաղաքացիներ Մուհամադ Ասիֆը և Միրհասան Սահաջանը:
«Դեսպանությունը կտրամադրի իր քաղաքացիներին այն ամենը, ինչի կարիքը նրանք կունենան»,– հայտնեցին Հնդկաստանի դեսպանությունից։
Հիշեցնենք` ադրբեջանական ստորաբաժանումները հունիսի 13-ից պարբերաբար կրակում են Երասխի հատվածում տեղակայված հայկական դիրքերի ուղղությամբ։ Այսօր ՊՆ–ն հայտնեց, որ Ադրբեջանի զինված ուժերը ժամը 11:45-ի սահմաններում կրակ են բացել Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ, ինչի հետևանքով վիրավորվել է Հնդկաստանի 2 քաղաքացի։
The post ՀՀ–ում Հնդկաստանի դեսպանությունը կապի մեջ է Երասխում վիրավորված հնդիկների հետ appeared first on ԳԱԼԱ.