Մակրոնը ոչ պատշաճ հյուր է Հարավային Աֆրիկայում կայանալիք ԲՐԻԿՍ-ի գագաթնաժողովում. ՌԴ ԱԳՆ
Մոսկվան Ֆրանսիայի նախագահ Էմանուել Մակրոնին ոչ պատշաճ հյուր է համարում Հարավային Աֆրիկայում կայանալիք ԲՐԻԿՍ-ի գագաթնաժողովում, այս դիրքորոշումը փոխանցվել է գագաթնաժողովն ընդունող երկրին, հինգշաբթի հայտնել է ՌԴ փոխարտգործնախարար Սերգեյ Ռյաբկովը։
«Հասկանալի է, որ մեզ համար նման թշնամական և անընդունելի քաղաքականություն վարող պետության ղեկավարը, որ այնքան ընդգծված համոզված է, որ Ռուսաստանին անհրաժեշտ է ակտիվորեն մեկուսացնել միջազգային ասպարեզում, կիսում է մեզ, այսպես կոչված, ռազմավարական պարտության մատնելու ՆԱՏՕ-ի գիծը, նման առաջնորդը տեղին չէ որպես ԲՐԻԿՍ-ի հյուր»,- Սոչիում լրագրողներին ասել է ռուս փոխնախարարը։
«Մենք չենք թաքցնում մեր այս դիրքորոշումը, մենք այդ մասին ասել ենք Հարավային Աֆրիկայի մեր գործընկերներին, և հուսով ենք, որ մեր տեսակետն ամբողջությամբ հաշվի կառնվի»,- շեշտել է նա:
Ռյաբկովը նշել է, որ «հյուրընկալող երկրի գործն է որոշել հրավիրյալների շրջանակը»։
«Հյուրընկալող կողմն է որոշում, թե ում ընդունել, ինչ ձևաչափով: Բայց ոչ պակաս կարևոր է, որ հրավերին նախորդեն ԲՐԻԿՍ-ի բոլոր մասնակիցների միջև խորհրդակցությունները»,- ասել է փոխնախարարը:
Նա հավելել է, որ «ԲՐԻԿՍ-ի ընդլայնման չափանիշները որոշ ժամանակ քննարկվել են, և ասոցիացիային միանալու թեկնածուները պետք է հետևեն քաղաքականությանը, որը բացառում է միակողմանի պատժամիջոցների կիրառումը ասոցիացիայի ակտիվ անդամներից որևէ մեկի նկատմամբ»:
«Հասկանալի է, որ Ֆրանսիան չի համապատասխանում այդ չափանիշին...այն բոլորովին հակառակ գիծ է տանում»,- ընդգծել է Ռյաբկովը։
Ավելի վաղ L'Opinion-ը, վկայակոչելով աղբյուրներ, հայտնել էր, որ Մակրոնը Հարավային Աֆրիկայի նախագահ Սիրիլ Ռամաֆոսայից հետաքրքրվել է, թե արդյոք հնարավորություն կա մասնակցելու ԲՐԻԿՍ-ի գագաթնաժողովին։