Կրեմլը խորհուրդ է տալիս գեներալ Սերգեյ Սուրովիկինին առնչվող հարցերով դիմել ՊՆ
«Վագներ» մասնավոր ռազմական ընկերության հիմնադիր Եվգենի Պրիգոժինի կազմակերպած խռովության փորձից հետո ռուսական մամուլում տեղեկություններ չեն հաղորդվում զինված ուժերի գլխավոր շտաբի պետ Վալերի Գերասիմովի և Ուկրաինայում ռուսական բանակի փոխհրամանատար Սերգեյ Սուրովիկինի մասին:
Ռուսաստանի Դաշնության նախագահ Վլադիմիր Պուտինի մամլո խոսնակ Դմիտրի Պեսկովն ասել է, թե ինքն էլ տեղեկություններ չունի և չգիտի, թե արդյո՞ք խռովությունից հետո հնարավոր են կադրային փոփոխություններ Պաշտպանության նախարարության համակարգում:
Պեսկովի փոխանցմամբ, երկրի զինված ուժերի գերագույն գլխավոր հրամանատարը Պուտինն է, և նա «աշխատում է պաշտպանության նախարարի ու գլխավոր շտաբի պետի հետ»: Խոսնակը հրաժարվել է տեղեկություններ հայտնել բանակի գեներալ Սերգեյ Սուրովիկինի մասին:
«Ոչ, դժբախտաբար, ոչ: Խորհուրդ եմ տալիս դիմել Պաշտպանության նախարարություն, դա նրանց իրավասությունն է»,- ասել է Պեսկովը, նշելով, որ տեղեկություն չունի նաև «Վագների» հիմնադիր Եվգենի Պրիգոժինի մասին: