Սեռական բնույթի առաջարկների համար մեղադրվող BBC-ի հաղորդավարը, ենթադրաբար, Հյու Էդվարդսն է
BBC հեռուստառադիոընկերության անվանի հաղորդավար Հյու Էդվարդսի կինը՝ Վիկի Ֆլիդը, հայտնել է, որ իր ամուսինն է «ինտիմ լուսանկարներով սկանդալի կենտրոնում»:
Այս մասին հայտնում է Ազատությունը։
Էդվարդսը մեղադրվում է տարիներ առաջ մի 17-ամյա տղայի մերկ լուսանկարների համար նրան 35 հազար ֆունտ ստերլինգ առաջարկելու համար: Այժմ տղան 20 տարեկան է:
Սկանդալը սկսվել այն բանից հետո, երբ շաբաթներ առաջ տղայի վրդովված մայրը բողոքով դիմել է BBC-ի ղեկավարներին: Ենթադրվում է, որ Էդվարդսը նմանօրինակ առաջարկ է ներկայացրել առնվազն ևս մեկ երիտասարդի:
Վիկի Ֆլինդը հայտնել է, որ իր ամուսինը՝ Հյուն, տառապում է ծանր հոգեկան հիվանդությամբ և հիմա մասնագիտական օգնություն է ստանում հիվանդանոցում, որտեղ կգտնվի տեսանելի ապագայում։ Հաղորդավարի կինը խնդրել է չմիջամտել իրենց ընտանիքի գործերին:
61-ամյա Հյու Էդվարդսը բրիտանացի ամենահայտնի հեռուստահաղորդավարներից է և այդ բնագավառում ամենաբարձր աշխատավարձ ստացող աշխատակիցներից մեկն է: Նա տարեկան ստանում է ավելի քան 400 հազար ֆունտ ստերլինգ:
Նա աշխատել է BBC-ում շուրջ 40 տարի, այդ թվում՝ 20 տարի վարել է Ten O'Clock News («Ժամը 10-ի լուրերը») լրատվական հեռուստածրագիրը:
Իր կարիերայի ընթացքում Հյու Էդվարդսը լուսաբանել է այնպիսի հրատապ իրադարձություններ, ինչպիսին էին թագուհի Եղիսաբեթ երկրորդի հոբելյանները, մահը, հուղարկավորությունը, արքայազն Ուիլյամի և Քեյթի հարսանիքը, ԱՄՆ նախագահ Բարաք Օբամայի երդմնակալությունը, Նելսոն Մանդելայի մահը և կարևոր այլ թեմաներ:
Էդվարդսը բնակվում է Լոնդոնում իր կնոջ և հինգ երեխաների հետ։ Նախկինում նա մի քանի անգամ խոստովանել է, որ ունի ընկճախտ (դեպրեսիա) և պայքարում է այդ հիվանդության դեմ։