Ուկրաինան և Լեհաստանը հայտնում են, որ «Վագների» մարտիկները ժամանել են Բելառուս
![Ուկրաինան և Լեհաստանը հայտնում են, որ «Վագների» մարտիկները ժամանել են Բելառուս](https://gdb.rferl.org/01000000-0aff-0242-8b68-08db85aba7fd_w800_h450.jpg)
«Վագներ» մասնավոր խմբավորման մարտիկները Ռուսաստանից ժամանել են Բելառուս և այնտեղ են, շաբաթ օրը հայտարարել են ուկրաինացի և լեհ պաշտոնյաները, հաղորդում է Reuters-ը։ Դրանից մեկ օր առաջ Մինսկը հայտարարել էր, որ վարձկանները մարզում են երկրի զինվորներին մայրաքաղաքից հարավ-արևելք:
«Վագները Բելառուսում է»,-նշել է ուկրաինական սահմանային գործակալության ներկայացուցիչ Անդրեյ Դեմչենկոն։ Նա ասել է, որ Բելառուսում նկատվել է Ռուսաստանից «առանձնացած խմբերի» տեղաշարժ։
«Վագների» որոշ մարտիկներ Բելառուսում են առնվազն երեքշաբթի օրվանից, Reuters-ին հայտնել են նրանց մոտ կանգնած երկու աղբյուրներ:
Բելառուսի պաշտպանության նախարարությունը ուրբաթ օրը տեսանյութ է հրապարակել, որում երևում է, որ «Վագների» անդամները բելառուս զինվորներին հրահանգավորում են Օսիպովիչ քաղաքի մոտ գտնվող զորամասում:
«Վագների» տեղափոխությունը Բելառուս գործարքի մի մասն էր, որը վերջ դրեց խմբավորման ապստամբության փորձին հունիսին, երբ նրանք վերահսկողության տակ առան ռուսական ռազմական շտաբը, երթով շարժվեցին դեպի Մոսկվա և սպառնացին Ռուսաստանին ներքաշել քաղաքացիական պատերազմի մեջ, ինչի մասին ասել էր նախագահ Վլադիմիր Պուտինը:
«Վագների» ղեկավար Եվգենի Պրիգոժինը չի երևացել հանրությանը Ռուսաստանի հարավային Դոնի Ռոստով քաղաքը հունիսի 24-ի ուշ երեկոյան լքելուց հետո։
Լեհաստանի հատուկ ծառայությունների համակարգման փոխնախարար Ստանիսլավ Զարինը ասել է, որ Վարշավան նույնպես հաստատում է նրանց առկայությունը Բելառուսում։
«Այս պահին նրանք կարող են լինել մի քանի հարյուր», - գրել է Զարինը Twitter-ում:
Լեհաստանն այս ամիս հայտարարեց, որ ուժեղացնում է Բելառուսի հետ իր սահմանը՝ հնարավոր սպառնալիքներին դիմակայելու համար: