Չինաստանի օրենսդիր մարմինը կքննարկի պաշտոնական կադրային փոփոխությունները․ ներդրողները հստակություն են ուզում երկրի ԱԳ նախարարի մասին
Չինաստանի բարձրագույն օրենսդիր մարմինը հանդիպում կանցկացնի՝ քննարկելու պաշտոնական կադրային փոփոխությունները։ Այս մասին հաղորդել է երկրի պետական CCTV հեռուստատեսությունը, գրել է Bloomberg-ը։
Ըստ Bloomberg-ի՝ ներդրողները սպասում են հստակության Չինաստանի Կենտրոնական բանկի նոր ղեկավարի, արտաքին գործերի նախարարի գտնվելու վայրի վերաբերյալ:
Ազգային Ժողովրդական Կոնգրեսի մշտական հանձնաժողովը երեքշաբթի կքննի նշանակումների և պաշտոնանկությունների հետ կապված հարցերը, ինչպես նաև ՉԺՀ-ի քրեական օրենսդրության փոփոխության նախագիծը:
Մանրամասներ չեն հաղորդվել, թե ինչ կադրային հարցեր են քննարկվելու։
Հուլիսի 22-ին Bloomberg-ը, հղում անելով իր աղբյուրներին, գրել էր, որ Միացյալ Թագավորության արտաքին գործերի նախարար Ջեյմս Քլևերլին անորոշ ժամանակով հետաձգել է հուլիսի վերջին նախատեսված այցը Պեկին, և պատճառներից մեկը նշվել էր Չինաստանի արտաքին գործերի նախարար Ցին Գանգի երկարատև բացակայությունը հանրային տիրույթից։