Ֆրանսիայի ԱԳ նախարարը Միրզոյանի հետ զրույցում հիշեցրել է, որ Ադրբեջանը պետք է կատարի իր միջազգային պարտավորությունները
Ֆրանսիայի եվրոպական և արտաքին գործերի նախարար Կատրին Կոլոնան ՀՀ ԱԳ նախարար Արարատ Միրզոյանի հետ հեռախոսազրույցում անդրադարձել է օգոստոսի 16-ին կայանալիք ՄԱԿ-ի Անվտանգության խորհրդի նիստից քննարկվելիք խնդրին՝ հումանիտար ճգնաժամը Լեռնային Ղարաբաղում՝ Ադրբեջանի կողմից Լաչինի միջանցքի արգելափակման հետևանքով։ Այս մասին հայտնել է երկրի ԱԳՆ մամուլի ծառայությունը։
Նախարարը հայտնել է «Ֆրանսիայի խորը մտահոգությունը, քանի որ ավելի քան ութ ամիս Լեռնային Ղարաբաղի բնակչությունը կրում է այս իրավիճակի հետևանքները»։ Նա ափսոսանք է հայտնել Ադրբեջանի կողմից շարունակվող այս շրջափակման մասին, որը «հակասում է հրադադարի համաձայնագրերով ստանձնած պարտավորություններին և վնասում է բանակցային գործընթացին»։
Նա ընդգծել է, որ առկա խնդիրները կարող են լուծվել միայն բանակցությունների միջոցով՝ հասնելու արդար ու կայուն խաղաղության, ինչպես հիշատակել է նախարարն ապրիլի 27-ին և 28-ին Ադրբեջան ու Հայաստան կատարած իր այցերի ժամանակ։
Նախարարը կրկնել է Լաչինի միջանցքով երկու ուղղություններով բեռների, մարդկանց և ապրանքների ազատ տեղաշարժը վերականգնելու և բնակչությանը գազի և էլեկտրաէներգիայի շարունակական մատակարարման իր կոչը։ Նա հիշեցրել է, որ Ադրբեջանը պետք է կատարի իր միջազգային պարտավորությունները, մասնավորապես՝ իրագործի Արդարադատության միջազգային դատարանի փետրվարի 22-ի որոշման մեջ նշված ժամանակավոր միջոցները, որոնք պարտադիր են։
Նախարարն իր գործընկերոջը վստահեցրել է Ֆրանսիայի լիարժեք մոբիլիզացիան Լեռնային Ղարաբաղի բնակչությանն աջակցելու համար, որը 3 միլիոն եվրո հավելյալ ներդրում կկատարի Կարմիր Խաչի միջազգային կոմիտեի մարդասիրական գործողությանը։
Վերջում, երկու նախարարները հիշատակել են նաև այսօր Հայաստանի սահմանին ԵՄ դիտորդական առաքելության (EUMA) պարեկության ժամանակ հնչած կրակոցների մասին։ Կոլոնան իր մտահոգությունն է հայտնել այս միջադեպերի կապակցությամբ ու լիակատար աջակցություն հայտնել եվրոպական առաքելությանը։