Եվգենի Մակարյան․ մանրամասներ Պրիգոժինի ինքնաթիռում եղած հայի մասին
ՌԴ Տվերի մարզում կործանված մասնավոր ինքնաթիռում Եվգենի Պրիգոժինի հետ եղել է նաև հայազգի Եվգենի Մակարյանը, որը «Վագներ» մասնավոր ռազմական ընկերության վետերաններից էր։
«Մակար» մականվամբ հայտնի Մակարյանը նախկինում ոստիկանության աշխատակից էր՝ տեղամասային տեսուչ։ Ըստ mk.ru-ի հրապարակած տվյալների՝ 38-ամյա Մակարյանն ապրում էր Չելյաբինսկի մարզի Մագնիտոգորսկ քաղաքում։ Նա պատերազմել է Սիրիայում և 2017 թվականին մասնակցել է անգամ ամերիկյան ավիացիայի հետ բախմանը։
Ավիավթարի հետևանքով զոհվել է նաև 37-ամյա Վալերի Չեկալովը, ով Պրիգոժինի ամենամտերիմ մարդկանցից էր և արտերկրում նրա նախագծերի համակարգողը, ինչպես նաև «Վագներ»-ի համահիմնադիր, հրամանատար Դմիտրի Ուտկինը, ով Պրիգոժինի աջ ձեռքն էր։
Զոհերի թվում են նաև «Կեդր» մականվամբ հայտնի 44-ամյա Սերգեյ Պրոպուստինը, ով «Վագներ»-ին էր միացել 2015 թվականին, «Տոտ» մականվամբ հայտնի 31-ամյա Ալեքսանդր Տոտմինը և հրաձիգ Նիկոլայ Մատուսեևը (ըստ մեկ այլ վարկածի՝ Նիկոլայ Մատուսևիչ), ով նույնպես կռվել է Սիրիայում։
Հիշեցնենք, որ օգոստոսի 23-ի երեկոյան ՌԴ Տվերի մարզում մասնավոր ինքնաթիռի կործանման հետևանքով զոհվել է 10 մարդ, այդ թվում՝ «Վագներ» մասնավոր ռազմական ընկերության հիմնադիրը Եվգենի Պրիգոժինը և «Վագների» հրամանատար Դմիտրի Ուտկինը։
Ավիաաղետը տեղի է ունեցել Տվերի մարզի Բոլոգովսկի շրջանում՝ Կուժենկինո բնակավայրի մոտակայքում։ Ինքնաթիռը Մոսկվայից թռչում էր Սանկտ Պետերբուրգ։