Ադրբեջանի մարդու իրավունքների հանձնակատարը հանդիպել է Հակարիի ապօրինի անցակետից բերման ենթարկված արցախցիներին
Ադրբեջանի մարդու իրավունքների հանձնակատար Սաբինա Ալիևան և Ազգային կանխարգելիչ խմբի անդամները հանդիպել են Հակարիի ապօրինի անցակետից ադրբեջանցիների կողմից առևանգված արցախցիներին։
Հանդիպման մասին գրել են ադրբեջանական լրատվամիջոցները։
«Կոնֆիդենցիալ հիմունքներով ընդունվածներին բացատրվել են իրենց իրավունքները, տեղեկություններ տրամադրվել օմբուդսմենի լիազորությունների մասին, իրենց մայրենի լեզվով տրամադրվել են մարդու իրավունքների ոլորտում միջազգային ակտեր, և լսվել նրանց դիմումները»,- (չակերտները - Tert.am) հայտնել է Ադրբեջանի օմբուդսմենի գրասենյակը։
Նշվում է նաև, որ այցի ընթացքում «նրանց հնարավորություն է տրվել հեռախոսով զրուցել ընտանիքի անդամների հետ» (չակերտները - Tert.am)։
Երեկ հայտնի դարձավ, որ նրանց նկատամամբ Ադրբեջանի դատախազությունը 10-օրյա կալանք է կիրառել։
Գլխավոր դատախազության հաղորդագրության հաղորդագրության համաձայն՝ «Ադրբեջանի պետական դրոշի նկատմամբ վիրավորական գործողություններ կատարելու փաստի առթիվ, քրեական գործ է հարուցվել քրեական օրենսգրքի 283.2.3 հոդվածի (Կազմակերպված խմբի կողմից իրականացվող ազգային, ռասայական, սոցիալական կամ կրոնական ատելություն և թշնամություն հրահրելը) և 324 (Ադրբեջանի Հանրապետության պետական դրոշի կամ պետական զինանշանի պղծում) հոդվածների հատկանիշներով» (չակերտները - Tert.am)։
Նաև նշվել էր, որ «դատարանի վճռի կատարումից հետո կապահովվի այդ անձանց վտարումը Ադրբեջանի Հանրապետության տարածքից» (չակերտները - Tert.am)։
Ավելի վաղ Արցախի մարդու իրավուքների պաշտպանը հայտնել էր, որ ժամը 13:00-ի սահմաններում դեպի Հայաստան տեղափոխվող անձինք հասել են Լաչինի միջանցքում՝ Հակարի կամրջի մոտ, տեղակայված ադրբեջանական անօրինական անցակետ։
Մարդու իրավունքների պաշտպանի աշխատակազմի կողմից ձեռք բերված տեղեկատվության համաձայն՝ 2001 թվականի ծնված Ալեն Նելսոնի Սարգսյանն ադրբեջանական սահմանապահ և այլ ծառայությունների ներկայացուցիչների կողմից ուժի և հարկադրանքի կիրառմամբ առևանգվել և տարվել է անհայտ ուղղությամբ։
Բացի դրանից, Արցախից ՀՀ տեղափոխվող անձանցից ևս հինգ հոգու Ադրբեջանի սահմանապահ և այլ ծառայությունների ներկայացուցիչները տարել են անցակետի մոտ տեղադրված հատուկ սենյակ՝ հարցաքննելու։ Հարցաքննության ընթացքում տվել են տարաբնույթ հարցեր՝ սպորտով զբաղվածությունը, ՀՀ գնալու նպատակը, Հայաստանում և Արցախում տնտեսական իրավիճակը և այլն։
Ձեռք բերված տեղեկությունների համաձայն՝ նախօրոք համաձայնեցված ցուցակներում առկա անձանցից ևս երկու հոգի՝ Վահե Հովսեփյանը և Լևոն Գրիգորյանը չեն հատել անօրինական անցակետը, սակայն չի հաջողվում նրանց հետ կապ հաստատել։
Երեք քաղաքացիներն էլ Հայաստանի Հանրապետության ուսումնական հաստատությունների ուսանողներ են։