Ավելի քան 1 տարի է, ոչ մի կուսակցության չեմ սատարում․ Առուշ Առուշանյան
Առաջին պլան պետք է գան ոչ թե մարդիկ, ովքեր քննարկում են կամ, չգիտեմ՝ ինչ են անում, այլ այն մարդիկ, ովքեր կռվի փորձ ունեն և կկարողանան մարդկանց մոտիվացնել։ Այս մասին Գորիսում լրագրողներին ասաց համայնքի ղեկավար Առուշ Առուշանյանը։
«Ճակատագիրն այդպիսին է։ Եվ ուրեմն մենք պետք է ևս մեկ անգամ պատերազմենք։ Բնության օրենքն է, պատերազմները եղել են, կան և միշտ էլ կլինեն։ Ուղղակի սա այն դեպքն է, որ չպետք է հանձնվել։ Եթե մի անգամ հանձնվեք, հաջորդը կլինի Սյունիքը, Երևանը և մնացածը»,- նշեց Առուշանյանը։
Անդրադառնալով «Վերածնվող Հայաստան» կուսակցությանը՝ Առուշանյանն ասաց, որ «ավելի քան 1 տարի է, ոչ մի կուսակցության չեմ սատարում»։
«Չեմ կարծում, որ պետք է մարդկանց անցած ուղին մեկ վայրկյանում քննարկել, քննադատել կամ ինչ-որ քայլերի գնալ։ Իմ հայացքներում ոչինչ չի փոխվել։ Ես ՀՀ-ի համար պատրաստակամ եմ, իմ պետության կողքին կանգնած եմ»,- նշեց նա։
Ինչ վերաբերում է իշխանությունների հետ համագործակցությանը՝ Գորիսի ղեկավարն ասաց․ «Նույնիսկ երբ ես եղել եմ կալանավայրում, համայնքապետարանը համագործակցություն ունեցել է»։
Առուշանյանն ասաց, որ չի կարող որևիցե սուբյեկտիվ, անձնական վերաբերմունք ունենանալ իշխանությունների հետ հարաբերություններում։
Նա նաև ասաց, որ որևէ սահամնամերձ գյուղից արտագաղթ չկա։ «Ավելին ասեմ։ Մարդիկ, ովքեր ունեին արտագնա աշխատանք, հիմա չեն բացակայում գյուղից, որովհետև կարծում են, որ հարկ եղած դեպքում պետք է լինեն գյուղում։ Եվ պեքտ է կանգնենն հայրենիքի կողքին»,- հավելեց համայնքի ղեկավարը։