Ռուսաստանի Ռոսկոմնադզորն արգելափակել է 23 կայք՝ ԼԳԲՏ նյութերը հեռացնել հրաժարվելու պատճառով
Ռոսկոմնադզորը РИА Новости-ին տեղեկացրել է 23 կայքերի արգելափակման մասին, որոնք չեն համապատասխանել գործակալության պահանջներին՝ հեռացնելու ԼԳԲՏ նյութերը։
Ռուսաստանի Կապի, տեղեկատվական տեխնոլոգիաների և զանգվածային հաղորդակցությունների վերահսկման դաշնային ծառայությունը հայտնել է, որ դրանք պարունակել են ԼԳԲՏ կոնտենտ։
«Արգելված նյութերը հեռացնելու վերաբերյալ գործակալության պահանջներին չհամապատասխանող 23 կայք արգելափակվել է։ Դրանցից հինգը նվիրված են ԼԳԲՏ թեմաներին, 18-ը ցանցահենային առցանց կինոթատրոնների կայքեր են, որոնք ֆիլմեր են տարածում ԼԳԲՏ քարոզչությամբ»,- ասված է հարցման պատասխանի մեջ։
Նշվում է, որ ԶԼՄ-ներում և համացանցում ոչ ավանդական սեռական հարաբերությունները խթանող նյութերի տարածման համար օրենքը նախատեսում է տեղեկատվական ռեսուրսների և ծառայությունների հասանելիության սահմանափակում, ինչպես նաև ՌԴ վարչական իրավախախտումների վերաբերյալ օրենսգրքի 6.21-րդ հոդվածով նախատեսված վարչական պատասխանատվություն: