Անկախության օրը «Եռաբլուրում» ընթացավ միջադեպերով
Անկախության օրն այսօր «Եռաբլուրում» միջադեպերով սկսվեց։ 2020 թվականի պատերազմում զոհված ու անհետ կորած զինծառայողների մի խումբ ծնողներ, հարազատներ ու քաղաքացիներ առավոտյան արգելեցին իշխող ուժի պատգամավորներ Հովիկ Աղազարյանին ու Հակոբ Ասլանյանին մտնել պանթեոնի տարածք, այդ թվում՝ նրանց մեղադրելով Հայաստանում ու Արցախում ստեղծված իրավիճակի համար։
Քաղաքացիներից մեկն անգամ հարվածեց Հովիկ Աղազարյանին։
Ծնողները երեկ կեսգիշերից էին հավաքվել հուշահամալիրի տարածքում, որ արգելեին իշխանության ներկայացուցիչներին, այդ թվում՝ վարչապետին մտնել պանթեոնի տարածք։ Հայաստանի բարձրագույն ղեկավարությունը մինչ այս պահը «Եռաբլուր» չի այցելել։
Երեկվա հանրահավաքին ընդդիմության ներկայացուցիչները հայտարարեցին, թե վաղ առավոտից կլինեն «Եռաբլուրում», սակայն նրանցից այսօր մի քանիսն են եկել պանթեոնի տարածք։
Պաշտպանության նախկին նախարար, այժմ «Հայաստան» խմբակցության պատգամավոր Սեյրան Օհանյանի հետ էլ վիճաբանության մեջ մտան տեղում հավաքված անհետ կորածների հարազատները, քաղաքացիներ։ Նրանք նաև ընդդիմությանն են մեղադրում Արցախում ու Հայաստանում կատարվողի համար. - «Մեղավոր եք, ունեցեք քաջություն, դուրս եկեք, սաղով կանգնեք աշխարհի առաջ պարզ ճակատով, ասեք՝ ժողովուրդ ջան, սխալ ենք արել, ներող կլինեք»։
«Բոլորն էլ սխալներ ունեցել են, ես ինձ համար կարամ պատասխան տամ, ես իմ կառավարման ժամանակ գիտեմ ինչից եմ սկսել և ինչի եմ հասել նախարարությունում, սկսել եմ հասարակ պատրաստությունից, պաշտպանության կազմերպումից և վերջացրել եմ զորահանդեսներով», - ասաց Օհանյանը։
Քաղաքացիներից մեկը նետեց, թե լայնածավալ կոռուպցիա է եղել, նախկին նախարարն արձագանքեց. - «Լայնածավալ կոռուպցիա չի եղել»։
Օհանյանն այսօր հայտնեց, թե ընդդիմությունը Նիկոլ Փաշինյանի իմպիչմենթի գործընթացն է սկսում։ Դիտարկմանը, թե ընդդիմադիր պատգամավորների թիվը բավարար չէ վարչապետի անվստահությանը հասնելուն, «Հայաստան» խմբակցության ղեկավարը ասաց, թե ժողովրդական ճնշմամբ են իշխանափոխության հասնելու։