Աշխատանքներ են տարվում ծանր վիրավորում ստացած 30 մարդու Արցախից ՀՀ տեղափոխելու ուղղությամբ․ ԱՀ առողջապահության նախարար
Ունենք մի քանի տասնյակ զոհեր, այդ թվում նաև քաղաքացիական անձանց շրջանում։ Զոհերի թվում կա երեխա, ում եղբայրը ևս ծանր վիճակում է։ Այս մասին Արցախի Հանրային հեռուստատեսության եթերում ասաց Արցախի առողջապահության նախարար Վարդան Թադևոսյանը՝ նշելով, որ ամեն րոպե փոխվում է իրավիճակը և, բնականաբար, փոխվում են նաև թվերը։
Ինչպես նշեց Թադևոսյանը, այսօր Մարտունիից վիրավորներ են բերել Ստեփանակերտի Հանրապետական հիվանդանոց, որտեղ կշարունակեն նրանց բուժումը, սակայն Արցախի առողջապահության նախարարությունը խնդիր ունի Մարտակերտից ծանր վիրավորում ստացածներին, ինչպես նաև մահացածների աճյունները տեղափոխելու հետ կապված։
«Ռուս խաղաղապահները փոխեցին պլանները և չունենք ուղեկցորդ», - նշեց նախարարը՝ հույց հայտնելով, որ գոնե վաղը կկարողանան ԿԽՄԿ օգնությամբ անել դա։
Նա նաև հայտնեց, որ աշխատանքներ են տարվում ծանր վիրավորում ստացած 30 անձի հնարավորինս արագ Արցախից Հայաստան տեղափոխելու համար։
«Այդ աշխատանքները կազմակերպելու համար ՀՀ առողջապահության նախարարության ներկայացուցիչների հետ հետ ենք աշխատում։ Ուրախ եմ, որ ԿԽՄԿ-ն համաձայնել է ուղեկցել»,– նշեց նախարարը՝ հավելելով, որ, ցավոք, ունենում են նաև դեպքեր, երբ ուշացման կամ ծանր վիրավորման պատճառով մարդկանց կյանքը փրկել չի հաջողվում։