Գնում ենք Երևանի ավագանու նոր ընտրությունների. Մարության
Մարությանը պարզաբանել է, որ «Հանրային ձայն» կուսակցությունից ավագանի ընտրված Արտակ Գալստյանը և Տիգրան Ուրիխանյանը չեն կարող մասնակցել հոկտեմբերի 10-ին նշանակված նիստին, քանի որ Ուրիխանյանը հետախուզվում է, Հայաստանում չէ, իսկ Գալաստյանը կալանավորված է, ինչն էլ նշանակում է, որ ընդդիմությունը չի ունենա բավարար ձայներ քաղաքապետ ընտրելու համար:
Հայկ Մարությանը հայտնել է, որ իրենց խմբակցությունը չի մասնակցելու նիստին, որպեսզի քվորում չապահովվի և նշանակվեն ավագանու նոր ընտրություններ: «Մայր Հայաստան» դաշինքը ևս հայտարարել է, որ «կոնսենսուսի բացակայության պարագայում՝ նիստին չներկայանալու և քվորում չապահովելու միջոցով Երևանի ավագանու նոր ընտրությունների անցկացումը կմնա միակ լուծումը»:
Մարությանը հիշեցրել է՝ եթե «Քաղաքացիական պայմանագիր» և «Հանրապետություն» խմբակցությունները մասնակցեն նիստին, քվորումի համար կպակասի մեկ ձայն: Այստեղ վճռորոշ կլինի «Հանրային ձայն» խմբակցության դիրքորոշումը, որը դեռ հայտնի չէ:
Սեպտեմբերի 17-ին կայացած ընտրություններից հետո պատկերն այսպիսին է. իշխող «Քաղաքացիական պայմանագիրը» 24 մանդատ ունի, Մարությանի գլխավորած «Ազգային առաջընթացը» 14, 12 մանդատ ունի «Մայր Հայաստան» դաշինքը, 8-ը «Հանրապետությունը», 7-ն էլ բաժին է հասել «Հանրային ձայնին»։
Հոկտեմբերի 10-ին Երևանի նորընտիր ավագանու առաջին նիստն է, հենց այդ օրը պետք է քաղաքապետ ընտրեն։ Ավագանու 65 անդամներից առնվազն 33-ի ձայնն է պետք։