Իտալիայում ավտոբուսի վթարից առնվազն 20 մարդ է զոհվել
La Repubblica պարբերականը վկայակոչել է Վենետիկի քաղաքապետ Լուիջի Բրունյարոյին, ով ասել է, որ զոհվել է առնվազն 20 մարդ, վիրավորների թիվը մոտ 40 է:
Մեստրեի երկաթուղային կայարանի մոտ գտնվող էստակաից ընկնելուց հետո ավտոբուսը հրդեհվել է:
Իտալիայի ներքին գործերի նախարար Մատեո Պյանտեդոզին ասել է, որ վթարվածը մասնավոր ավտոբուս էր: Դեպքի վայրում են փրկարար ծառայությունները, ոստիկանությունը և շտապօգնության խմբերը։
Չի բացառվում, որ ավտոբուսը զբոսաշրջիկներ է փոխադրել: Այն Մեստրեից պետք է հասներ Վենետիկ:
Զոհվածների թվում կա առնվազն 2 երեխա: Կան նաև անհետ կորածներ: Մեստրեի և Վենետիկի միջև երկաթուղային հաղորդակցությունը դադարեցվել է:
Իտալիայի վարչապետ Ջորջա Մելոնին ցավակցություն է հայտնել ողբերգության կապակցությամբ, իսկ նախագահ Սերջո Մատարելան «սարսափելի ողբերգություն» է անվանել տեղի ունեցած վթարը: