«Նիկոլ, եթե 7 օրվա համար Սամվել Շահրամանյանն է մեղավոր, բա 5,5 տարվա կառավարման համար ո՞վ է մեղավոր»
«Ամեն ինչ սկսվեց նրանից, երբ որ Նիկոլ Փաշինյանը Պրահայում ճանաչեց Արցախն Ադրբեջանի մաս: Վերջ: Ինքը դրանով փակեց Արցախի էջը: Նիկոլ Փաշինյանը բերվել է իշխանության, որպեսզի քանդի Հայաստանի երրորդ Հանրապետությունը: Նա շատ բարեհաջող ձեւով դա անում է»,-ասում է ՀՀԿ գործադիր մարմնի անդամ Էդուարդ Շարմազանովը:
Անդրադառնալով երեկ ԱԺ ամբիոնից Փաշինյանի հնչեցրած մեղադրանքներին՝ ուղղված խորհրդարանական ընդդիմության ներկայացուցիչներին, թե «նրանք են հարվածի տակ դրել Արցախը, երբ տոնել են իշխանության փոփոխությունը Արցախում»,-Շարմազանովը ԳԱԼԱ-ի «Կարեւորի մասին» հաղորդման շրջանակներում նշել է.
«Բա իր 5,5 տարվա կառավարման մեղքը ումն է: Ո՞նց է լինում իր 5,5 տարվա կառավարման համար մեղավոր են Լեւոն Տեր-Պետրոսյանը, Քոչարյանն ու Սարգսյանը, Արցախի ընդամենը 7 օրվա կառավարման համար մեղավոր է Սամվել Շահրամանյանը, իսկ Նիկոլն ու իր խունտան կապ չունե՞ն»:
Անդրադառնալով Արցախում կատարվածին, Արցախի ռազմաքաղաքական ղեկավարության գերեվարմանը, Շարմազանովն ասում է.
«Արեւմուտքը պետք է դե՞մ դուրս գա Թուրքիային եւ Ադրբեջանին, որը այս երեք տարվա ընթացքում որեւէ սանկցիա չի կիրառում հանցագործ Ալիեւի նկատմամբ, որը լռում է, երբ Արցախի ընտրված իշխանությունները գերեվարվում են: Նրանց մեղքը ո՞րն է, Բակո Սահակյանի, Արայիկ Հարությունյանի, Արկադի Ղուկասյանի մեղքը ո՞րն է: Նրանք ընտրված ղեկավարներ են: Ազգերի ինքնորոշման իրավունքը եղել է ԵԱՀԿ Մինսկի խմբի երեք հիմնական սկզբունքներից մեկը, որը ճանաչել են բոլորը:
Ներքին առումով մեղավորը Նիկոլն է, բայց աշխարհաքաղաքական առումով եւ՛ ԵՄ-ի, եւ՛ Ռուսաստանի եւ ԱՄՆ-ի վրա էլ Ալիեւը թքեց եւ ցույց տվեց, որ ուժով կարող է հարց լուծել»:
The post «Նիկոլ, եթե 7 օրվա համար Սամվել Շահրամանյանն է մեղավոր, բա 5,5 տարվա կառավարման համար ո՞վ է մեղավոր» appeared first on ԳԱԼԱ.