Եվրահանձնաժողովն առաջարկում է պատժամիջոցներ սահմանել Մեդվեդևի որդու և Պուտինի բարեկամուհու նկատմամբ
Եվրահանձնաժողովն առաջարկում է Մոսկվայի դեմ պատժամիջոցների 12-րդ փաթեթը, որը ներառում է սահմանափակումներ բազմաթիվ անձանց, այդ թվում՝ ՌԴ նախկին նախագահ Դմիտրի Մեդվեդևի որդու և ՌԴ գործող նախագահ Վլադիմիր Պուտինի բարեկամուհու նկատմամբ:
Այս մասին գրում է theguardian.com-ը՝ մանրամասնելով, որ հանձնաժողովը ցանկանում է ցանկում ներառել 47 անձի, այդ թվում՝ Պուտինի զարմուհի Աննա Ցիվիլևային: Նա նախագահում է «Հայրենիքի պաշտպաններ» հիմնադրամը, որն աջակցում է Ուկրաինայում կռվող ռուս զինվորներին:
Ցուցակում է նաև Իլյա Մեդվեդևը, որի անունն ու ծննդյան ամսաթիվը համընկնում են նախկին նախագահի միակ որդու անվան և ծննդյան ամսաթվի հետ: Նա թիրախավորվել է Ուկրաինայում ապատեղեկատվության և քարոզչական արշավ կազմակերպելու համար:
Առաջարկությունները պետք է հաստատվեն ԵՄ առաջնորդների կողմից դեկտեմբերին կայանալիք հաջորդ գագաթնաժողովում: