ՀՀ-ի համար առաջնայինն այն է, որ սկզբունքները պահպանվեն այն հարթակներում, որտեղ կանցկացվեն բանակցությունները․ Արթուր Հովհաննիսյան
Այսօր մենք մի իրավիճակում ենք հայտնվել, որ նոյմբերի 9-ի հայտարարության սկզբունքային հարցերը՝ կապված Լեռնային Ղարաբաղի հայերի անվտանգության ապահովման հետ, չեն իրականացվել, խափանվել են, և այստեղ լեգիտիմ հարցը և մտահոգությունը մնում է։
Այս մասին խորհրդարանական ճեպազրույցի ժամանակ ասաց ԱԺ Արտաքին հարաբերությունների մշտական հանձնաժողովի նախագահ Սարգիս Խանդանյանը՝ պատասխանելով հարցին՝ արդյոք բանակցությունների մոսկովյան հարթակի նկատմամբ հայկական կողմից անվստահություն կա։
«Դա լեգիտիմ հարցադրում և մտահոգություն է։ Կա բանակցային որոշակի տրամաբանություն և գործընթաց։ Շատ կարևոր է, որ բանակցությունները կրկին չվերադառնան զրոյական կետի։ Հայկական կողմը միշտ պատրաստ է բանակցությունների և տեսնում ենք, որ Ադրբեջանը խուսափում է դրանից»,- նշեց նա։
ՔՊ խմբակցության քարտուղար Արթուր Հովհաննիսյան էլ հավելեց, որ վստահությունը բխում է իրողությունից։
«Հարթակների հետ կապված մենք նշել ենք, որ ՀՀ-ի համար առաջնայինն այն է, որ սկզբունքները պահպանվեն այն հարթակներում, որտեղ կանցկացվեն բանակցությունները, դա տարածքային ամբողջականության ճանաչում է, ճանապարհների ապաշրջափակումը՝ սուվերենության սկզբուքնով։ Այս սկզբունքների պահպանության դեպքում մենք չենք տարանջատում հարթակները»,- ընդգծեց նա։