Երևանում «Toyota»-ն բախվել է «Ford»-ին, ապա հայտնվել թունելի սկզբնամասում՝ փակելով ճանապարհը․ եզրաքարերին բախվելուց վնասվել է 2 մեքենա
Այսօր՝ մարտի 1-ին, խոշոր ավտովթար է տեղի ունեցել Երևանում։
Ժամը 20։50-ի սահմաններում Արցախի Հանրապետության քաղաքացի 19-ամյա Յուրի Ե․-ն իր վարած «Toyota Corolla» մակնիշի ավտոմեքենայով Մյասնիկյան պողոտայից դեպի Հերացի փողոց ընթանալիս, դեռևս անհայտ հանգամանքներում, բախվել է բաժանարար գոտու բազալտե եզրաքարին, ապա բախվել Հայկանուշ Լ․-ի վարած «Ford Focus» մակնիշի ավտոմեքենային և առաջ ընթանալով բախվել թունելի բետոնե հենապատին և հայտնվել դեպի Հերացի թունել տանող հատվածի սկզբնամասում՝ փակելով ճանապարհի ողջ երթևեկելի գոտին:
Shamshyan.com-ի տեղեկություններով, վթարի հետևանքով 1 հոգի բժշկական հետազոտման նպատակով տեղափոխվել է Հերացու անվան թիվ 1 համալսարանական հիվանդանոց։
Բախման հետևանքով բետոնե եզրաքարերին հարվածելու պատճառով մի քանի եզրաքար շպրտվել ու վնասել են Արսեն Մանասյանի վարած «Nissan Armada» և մեկ այլ քաղաքացու BMW մակնիշի ավտոմեքենան։
Ֆոտոլրագրողի տեղեկություններով՝ պարեկային ծառայությունում օպերատիվ տեղեկություններ են ստացել, որ վթարի պատճառը եղել է մեկ այլ վարորդի կողմից «Toyota»-ի վարորդի առջև խոչընդոտ ստեղծելը։ Այդ տեղեկությունը պարեկային ծառայությունը պարզում է։