Նախքան ասելը, որ ՀԱՊԿ-ը պարտավոր է նշել իր պատասխանատվության գոտին, անհրաժեշտ է սահմանել Հայաստանի սահմանները. Լավրով
Հայաստանն ինքը դեռ չի կարողանում որոշել իր տարածքում Հավաքական անվտանգության պայմանագրի կազմակերպության (ՀԱՊԿ) պատասխանատվության գոտին։ Այս մասին Спутник, Говорит Москва, Комсомольская правда ռադիոկայաններին տված հարցազրույցում ասել է ՌԴ ԱԳ նախարար Սերգեյ Լավրովը։
Այս առումով ՌԴ նախարարը մատնանշել է «Հայաստանի սահմանները գծելու, սահմանազատումն ավարտելու» անհրաժեշտությունը՝ նախքան ՀԱՊԿ-ի կողմից իր պատասխանատվության գոտին սահմանելու մասին խոսելը։
«Երբ ասում են, որ ՀԱՊԿ-ը չի կարողանում սահմանել իր պատասխանատվության գոտին Հայաստանում, հարկ է նշել, որ Հայաստանն ինքն էլ այն չի սահմանել: Նրանք հայտարարել են, որ Ադրբեջանի հետ հարգում են 1991թ. Ալմա Աթայի հռչակագրի սահմանները, ինչը նշանակում է, որ Ղարաբաղն Ադրբեջանի կազմում է: Զուգահեռաբար նրանք ստեղծել են սահմանազատման հանձնաժողով և զուգահեռաբար Փաշինյանը վերջերս հայտարարել է Տավուշի մարզում ոչ անկլավային գյուղերի մասին, որոնք պատրաստ է փոխանցել: Նա հիմա այդ մարզում բնակչությանը համոզում է, որ այլ կերպ վարվելը սխալ կլինի: Իսկ 1991թ. սահմանները, որոնք Փաշինյանը ցանկանում էր, որ ՀԱՊԿ-հաստատեր ու պաշտպաներ, հաշվի չեն առնվում», - ասել է Լավրովը:
«Ուստի նախքան ասելը, որ ՀԱՊԿ-ը պարտավոր է նշել իր պատասխանատվության գոտին, անհրաժեշտ է սահմանել Հայաստանի սահմանները, ավարտել սահմանազատումը, ինչն ակտիվորեն անում է Հայաստանի ղեկավարությունը»,- հավելել է նա։