Դուք ձեր չափը լավ ճանաչեք. այն գործիքները, որ դուք 20 տարի կիրառել եք, կկիրառվեն ձեր դեմ. Խաչատուր Սուքիասյանը՝ ընդդիմադիրներին
Հայաստանն ուզում է ուժեղանալ, ուզում է ամրապնդել իր սահմանները, հզոր պետություն դառնալ, Հայաստանի քաղաքացիները, պատգամավորները, կուսակցությունները խանգարում են դրան: Այս մասին Ազգային ժողովում ելույթի ժամանակ ասաց ՔՊ խմբակցության պատգամավոր Խաչատուր Սուքիասյանը։
«Չգիտեմ՝ շատերը միտումնավոր են անում, թե չհասկանալով՝ ինչ գործողություն են կատարում ու ինչ վատ անուն են ունենալու պատմության մեջ։ ՀՀ-ն պետք է լինի հզոր, անկախ պետություն։ Հաշվի առնելով մեր ունեցած տեղեկությունները՝ մեզ մոտ կարծիք է ստացվում, որ մեր գործընկերները և ՀՀ շատ քաղաքացիներ ծառայում են այլ պետություններին, և մի մասն ուղղակի ծառայում է պայմանագրային հարաբերությունների արդյունքում, մի մասը չգիտակցելով՝ իր ընկերներին լսելով։ Եթե մենք գնանք տարիներ հետ և տեսնենք, թե ՀՀ-ն ովքեր են ղեկավարել, ինչ ձևով են կառավարել ու թե ինչ ձևով են վերաբերվում այն մարդկանց, ովքեր մի օտար երկրի անուն էին տալիս։ Շատ վատ էին վարվում, նրանք կամ բանտում էին հայտնվում, կամ մահանում էին, կամ ունեզրկվում։ Եթե դուք ձեր չափը չճանաչեք և խանգարեք ՀՀ-ի զարգացմանը, ձեզ հետ նույն գործիքներով կխոսենք: Դուք պետք է ձեր չափը լավ ճանաչեք։ Այն գործիքները, որը դուք 20 տարի կիրառել եք, կկիրառվեն ձեր դեմ: Ես որպես Հայաստանի քաղաքացի, որն ունի ընտանիք, զավակներ, թոռներ, ամեն ինչ անելու եմ, որ Հայաստանը լինի հզոր, ուժեղ: Իսկ մնացած հորինվածքները, որոնք հորինում եք՝ սահմանները, հողերը տվեցին, դրանք նրա համար են, որ շատ լավ կարողանաք հասարակությանը գցել մոլորության մեջ։ Ամենավատ վնասը տվել եք Ղարաբաղի քույրերին ու եղբայրներին, երբ նրանց հրավիրել եք ձեր միտինգին։ Նրանք Հայաստանի քաղաքացիների, գործարարների ջանքերի ու հարկերի շնորհիվ են կարողանում համապատասխան նպաստը ստանալ, բնակարանները, տները, որոնք ապագայում կունենան, որոնք մինչև այսօր ֆինանսական ոչ մի խնդիր չունեն։ Շատ մեծ վատություն եք անում», - նշեց նա։
Սուքիասյանն ասաց, որ տեղեկությունների ունի 44-օրյա պատերազմի որոշ դրվագների մասին։
«Որպես Հայաստանի քաղաքացի, որն ամեն ինչից տեղեկացված է, 44-օրյա պատերազմի ժամանակ միտումնավոր մարդիկ տեղերը տվել են, որպեսզի մեր զինվորներին սպանեն։ Ինչո՞ւ։ Որպեսզի այդ ժամանակվա իշխանությունը պարտվի։ Ես այնտեղ եմ եղել, դուք էլ գիտեք, որ սեպտեմբերի 29-ին եղել եմ այնտեղ, Ղարաբաղի նախագահի համապատասխան բունկեր էր կոչվում, այնտեղ եղած ժամանակ տեսել եմ Սամվել Բաբայանին, որ այդ մտքերն ասել է այդ ժամանակվա Ղարաբաղի գործող նախագահին։ Ես ոչ մի բան ինձնից չեմ հորինում։ Բաբայանին այդ ժամանակ առաջին անգամ եմ տեսել ու ծանոթացել»,- ասաց նա։
Ընդդիմադիր պատգամավորները տեղից հակադարձեցին պատգամավորին։
«Ես ասում եմ՝ արդեն չափ կա։ Ընդդիմություն եք, պետք է այդ իրավունքներն ունենաք, բայց չափ կա։ Սա պետություն է, կարո՞ղ է գիտեք ինչ-որ տեղից բերել եք, ոնց ուզեք, ինչ ուզեք կանեք։ Ես ձեզ զգուշացնում եմ ու զգուշացնում եմ որպես Հայաստանի քաղաքացի։ Ուզում եմ իմ երկրում մարդիկ հանգիստ ապրեն, Հայաստանն ուժեղանա, իր հարևանների հետ ունենա բարիդրացիական հարաբերություններ, հզոր բանակ, բայց ոչ մեկի հետ չկռվի։ Սա պետք է լինի մեր մոտեցումը։ Դուք գիտե՞ք, որ 500 միլիոն դոլար համապատասխան միջազգային կառույցները Հայաստանի տարբեր ծրագրերի համար գումարներ էին հատկացնում։ Ոչ մեկիդ մտքով չի անցնո՞ւմ՝ հետո ինչու ասացին՝ գնացեք Օպերայի շենքը գրավեք, Օպերայի շենքում թույլ մի տվեք։ Ինչո՞ւ։ Որովհետև այդ գումարները գալու էին Հայաստանի տարբեր ճյուղերի զարգացման համար, դա գեներացիա էր ապահովելու։ Ու դուք պատկերացնում եք, թե դա պատահական է ստացվել, երբ Հայաստանում 30 տարվա պատմության մեջ առաջին անգամ Եվրոպայի զագացման և վերակառուցման բանկի տարեկան ժողովն է ընթացել, որտեղ 2000-ից ավելի հրավիրյալներ են եղել, 2000-ն էլ տարբեր ֆինանսական կազմակերպությունների, բանկերի աշխատակազմում են։ Մտածված է, որպեսզի Հայաստանը ինքնուրույնություն չունենա, գումարներ չվերցնի, բյուջեի խնդիրները չլուծի, գեներացիա չապահովի։ Մի բան ևս նշեմ՝ եկեք բոլորով իրար հետ հավաքվենք, Հայաստանն ուժեղացնենք։ Այդ իշխանության ձգտելը... ես չեմ կարծում, որ դա ստացվելու է, քանի որ Հայաստանի քաղաքացիները գիտակցում են»,- ասաց Խաչատուր Սուքիասյանը։