Այսօր Գյումրիի փրայմըրիզի վերջին օրն է. արդյունքները հայտնի կդառնան երեկոյան
Թեկնածուները բուկլետներով, պաստառներով իսկական ընտրություններին վայել պատրաստվել էին, որ շահեին գյումրեցիների վստահությունն ու թեկուզ ժամանակավոր, բայց զբաղեցնեն քաղաքապետի արդեն մեկ ամսից ավելի թափուր աթոռը։ ՔՊ փոխնախագահ Վահագն Ալեքսանյանն ասում է՝ շրջիկ խմբերը ժամը 9-ին կավարտեն փրայմըրիզը և կսկսվի ձայների հաշվարկը։
Երկու օրերի ընթացքում շրջիկ խմբերը տարբեր թաղերում թակել են բազմաթիվ դռներ, բայց քվերաթերթիկը դեռ 669 գյումրեցի է լրացրել։ Եթե այսօր էլ նախորդ երկու օրերի նման 300-ից ավելի քվերակող լինի, հանրագումարում 1100 մասնակիցը դժվար թե գերազանցի։ Իսկ Գյումրիում վերջին ՏԻՄ ընտրություններին 109 հազարից ավելի ընտրող է հաշվառվել ընտրացուցակում։ Ստացվում է ընտրողների ընդամենը 1 տոկոսը կորոշի, թե ով է լինելու ժամանակավոր պաշտոնակատար։ ՔՊ-ում, սակայն, այլ հաշվարկ ունեն։
«Ինչքան էլ ասում եք՝ 100 հազարանոց քաղաք, բայց այստեղ մի հարց կա, օրինակ, նախորդ ՏԻՄ ընտրություններին 20 քանի հազար մարդ էր մասնակցել ընդամենը: Այսինքն այս կոնտեքստով եթե նայենք, արդեն նախորդ ընտրությունների մասնակցության ընդհանուր թվի 3 տոկոսի չափով ունենք մասնակցություն նախնական ընտրություններին», - ասաց Վահագն Ալեքսանյանը:
Գյումրիի ՏԻՄ վերջին ընտրություններին 109 հազար 453 ընտրողից 26 հազար 468 ընտրող էր մասնակցել։ Մասնակցության նման ցածր ցուցանիշ Գյումրիի ՏԻՄ ընտրություններում երբեք չէր գրանցվել։ 9000 քվեով հաղթած քաղաքական ուժը՝ «Բալասնյան» դաշինքը միանձնյա իշխանություն ձևավորել չէր կարող և ՔՊ-ի հետ կոալիցիա կազմեց, որը 2 տարի անց խզվեց։ Իսկ մեկ տարի էլ չանցած Գյումրիի նախկին քաղաքապետ Սամվել Բալասանյանի հետ սերտորեն առնչվող «Բալասանյան» դաշինքն ու քաղաքապետը մանդատները վայր դրեցին, երբ Բալասանյան ընտանիքի ու մերձավորների նկատմամբ քրեական վարույթներ հարուցվեցին։
Հոկտեմբերի 28-ից մինչ այս պահը Գյումրին առանց կառավարիչների է մնացել։ Իշխանությունները կառավարման այս ճգնաժամի համար հենց իշխանությունից հրաժարված քաղաքական ուժին քննադատեցին։ Իսկ «Բալասանյան» դաշինքն այդպես էլ մինչ օրս չի բացատրել իր 9000-ից ավելի ընտրողներին, թե ինչու հեռացան իշխանությունից։
Առանց կառավարման մնացած երկրորդ քաղաքում իշխանությունները սկզբում որոշեցին արագացնել արտահերթ ընտրությունների անցկացումը՝ ավագանու արտահերթ նիստ հրավիրելով, որն այդպես էլ չկայացավ քվորում չապահովվեց։ Հետո պարզվեց, որ առանց համայնքապետի ժամանակավոր պաշտոնակատարի արտահերթ ընտրություններ հնարավոր չէ կազմակերպել՝ տեղամասերի ու պաստառների վայրերի հատկացման համար ստորագրող համայնքապետը չկար։ Ու թեև սկզբում ՔՊ-ն մեկ թեկանածու ուներ՝ ԱԺ պատգամավոր ՔՊ Գյումրիի կառույցի ղեկավար Կարեն Սարուխանյանին, բայց վերջինիս նարկոսկանդալում հայտնվելուց հետո ՔՊ-ում մտափոխվեցին ու որոշեցին կուսակիցների ու համակիրների միջև ընտրություն անել ու եռօրյա փարյմըրիզ անցկացնել։
7 թեկնածու կա՝ պատգամավորներ Կարեն Սարուխանյանը և Դավիթ Առուշանյանը, Միասնական սոցիալական ծառայության Գյումրիի ստորաբաժանման պետ Սարիկ Մինասյանը, էկոնոմիկայի նախարարության ներդրումային քաղաքականության բաժնի ղեկավար Լևոն Անանյանը, Գյումրիի նախկին փոխքաղաքապետ, վարչապետի տիկնոջ ազգական Վահագն Մկրտչյանը, ՔՊ ավագանու անդամ Շավարշ Արամյանը, ՔՊ երիտթևի Շիրակի համակարգող Էմմա Բարսեղյանը։
Նախնական ընտրությունների արդյունքների ամփոփումից հետո «Քաղաքացիական պայմանագրի» վարչությունը կհրապարակի, թե վարչապետը ում է նշանակելու Գյումրիի համայնքապետի ժամանակավոր պաշտոնակատար։ Մինչ այս, սակայն, դեռ օրենք էլ պիտի փոխեն, որ վարչապետին այդ լիազորությունը տրվի։