Ինչպե՞ս է ՔՊ-ն կանխելու նախկինների և օլիգարխների վերադարձը
Ինչպե՞ս է իշխանությունը պատրաստվում արգելել ընդդիմադիր ուժերին ընտրություններից հետո Գյումրիի սցենարով միավորվել և իշխանություն վերցնել: Վերջին օրերին ՔՊ-ական առանցքային գործիչները մեկը մյուսի հետևից զգուշացնում են՝ «Գյումրի 2» թույլ չեն տալու:
«Պարզ չէ՞, որ ոչ մեկ չի պատրաստվում նրանց ուղղակի արգելի, եթե չունեն անահամատեղելիություն, երկու երկրի քաղաքացի չեն, Սահմանադրություն չեն խախտում և թեկնածուի բոլոր չափանիշներին համապատասխանում են, ապա կարող են լինել թեկնածու, հետևաբար քաղաքացին կարող է գնալ և ընտրել»,- ասում է իշխող «Քաղաքացիական պայմանագրի» պատգամավոր Հասմիկ Հակոբյանը։
ՔՊ-ից վստահեցնում են՝ քաղաքացիներին բացատրելով, լուսավորելով են փորձելու կանխել «Գյումրի 2» սցենարի կրկնությունը՝ ցույց տալով, որ նախկինները կրկին փորձում են իշխանության գալ:
Հասմիկ Հակոբյան.- «Պարոն Թաթոյանը, Կարապետյանների ընտանիքը նրանք ամբողջությամբ ներծծված են նախկին իշխանության մեջ: «Հանրապետականի» ֆրակցիայի ղեկավար է եղել, Սերժ Սարգսյանի աշխատակազմի ղեկավար է եղել, նրանց թիմում կարող եք տեսնել նախկին նախարարների, տարբեր գործիչների»
«Ազատություն».- Հիմա ձեր զգուշացումների՝ թույլ չենք տալու... գործիքը ո՞րն է լինելու։
Հասմիկ Հակոբյան.- «Գործիքը ասացի՝ ասել քաղաքացուն, որ եթե իշխանության գալու հնարավորություն ունենան այն ուժերը, ովքեր այլընտրանք են մեզ, նրանք բերելու են իշխանության մի որևէ օլիգարխի, որովհետև հավակնողները օլիգարխներ են»:
«Ազատություն».- Ո՞վ է օլիգարխ: Օրինակ՝ ասում են՝ Գագիկ Ծառուկյանը օլիգարխ չէ:
Հասմիկ Հակոբյան.- «Իրո՞ք, ուրեմն, ես էլ այլմոլորակային եմ։ Ի՞նչ է նշանակում Գագիկ Ծառուկյանը օլիգարխ չէ։ Ծառուկյանին հարցրեք, ինքը կասի, որ օլիգարխ է կամ նրա հայտարարագիրը նայեք, նրա դղյակը տեսեք»։
«Ազատություն».-2018-ին Նիկոլ Փաշինյանն էլ է ասել, որ Գագիկ Ծառուկյանը օլիգարխ չէ։
Հասմիկ Հակոբյան.- «Ես չգիտեմ՝ Դուք ինչ հայտարարությանն եք հղում անում և ինչ կոնտեքստում, ըստ Ձեզ, Գագիկ Ծառուկյանը, Սամվել Կարապետյանը, Ռոբերտ Քոչարյանը, նրանց մերձ շրջապատը, Վանեցյանը և այն մարդիկ, ովքեր հավակնում են մասնակցել ընտրություններին, նրանք ուղղակի միջին վիճակագրական հայե՞ր են, իրո՞ք»։
«2026 թվականի ընտրություններից հետո դուք այլևս չեք տեսնելու քաղաքականությամբ զբաղվող օլիգարխ»,- չնայած Նիկոլ Փաշինյանը խոստանում է 2026-ի ընտրություններից հետո լուծել քաղաքականությամբ զբաղվող օլիգարխների հարցը, սակայն 8 տարի առաջ՝ 2018-ի հոկտեմբերին, հենց Գագիկ Ծառուկյանի ներկայությամբ, Փաշինյանը հայտարարում էր՝ Հայաստանում այլևս օլիգարխներ չկան: ԲՀԿ առաջնորդն այն ժամանակ վարչապետի համար ընդամենը խոշոր սեփականատեր էր:
«Պարոն Ծառուկյանը Հայաստանում խոշոր սեփականատեր է, դա ոչ մեկի համար գաղտնիք չէ, Հայաստանում օլիգարխներ չկան», - ասել էր Փաշինյանը։
Օլիգա՞րխ է արդյոք Խաչատուր ՍուքիասյանըՄինչ իշխող ՔՊ-ն ընտրություններց մի քանի ամիս առաջ փորձում է ցույց տալ հանրությանը, որ իշխանության են փորձում գալ օլիգարխներն ու նախկինները՝ հետ բերելով նախկին արատավոր երևույթները, ընդդիմադիրները մատնանշում են Նիկոլ Փաշինյանի իշխանության օլիգարխներին:
Մասնավորապես, Ծառուկյանի հետ միասին ընտրություններին մասնակցող «Մայր Հայաստան» կուսակցության ղեկավարը հիշեցնում է ՔՊ-ական պատգամավոր, մեծահարուստ Խաչատուր Սուքիասյանի, նախկին մեծահարուստ գործարար, այժմ Ռուսաստանում Հայաստանի դեսպան Գուրգեն Արսենյանի անունները:
«Ազատություն»- Օրինակ՝ Խաչատուր Սուքիասյանն օլիգարխ չէ՞։
Հասմիկ Հակոբյան.- «Կան գործարարներ, և մենք չենք թաքցնում և պարոն Սուքիասյանը և իր ընտանիքը, երևի ես ծնված չէի, երբ որ նրանք գործունեություն էին ծավալում...»։
«Ազատություն».- Ծառուկյաններն էլ էին այդպես։
Հասմիկ Հակոբյան.-«Պարոն Սուքիասյանը հիմա հավակնում է լինել վարչապե՞տ և կապիտալով Ռուսաստանի Դաշնությունից եկած մա՞րդ է, անգամ հայերերն երկու խոսք իրար կապել չգիտի, Դուք համեմատում եք շատ խորը արմատներով հենց Ռուսաստանի Դաշնության գործարարների հե՞տ պարոն Սուքիասյանին»։
«Ազատություն».- Ես հարցնում եմ՝ Խաչատուր Սուքիասյանը օլիգա՞րխ է, թե՞ ոչ։
Հասմիկ Հակոբյան.- «Խաչատուր Սուքիասյանը և իր ընտանիքը մշտապես ունեցել են կարողություն, ես ուզում եմ խոսել այն մարդկանց մասին, ովքեր հավակնում են երկրի կառավարումը ստանձնել։ Մեր առաջին համար վարչապետ Նիկոլ Փաշինյանը օլիգարխ չէ և արմատներով ինչ-որ երկրի մեջ մխրճված չէ: Վանեցյանը ո՞վ է։ Վանեցյանը միջին վիճակագրական հա՞յ է»։
«Ազատություն».- Ձեր իշխանության ԱԱԾ նախկին տնօրեն է, եթե օլիգարխ էր, ինչո՞ւ էիք ԱԱԾ տնօրեն նշանակել:
Հասմիկ Հակոբյան.- «Ես ասում եմ՝ մեր վարչապետի թեկնածուն ո՛չ օլիգարխ է, ո՛չ արմատներով խրված է ինչ-որ երկր մեջ։ Հետևաբար չի կարող սպասարկել մեկ այլ երկրի շահ»։
Օրերս վարչապետ Նիկոլ Փաշինյանն ասել էր. «Էս ընտրությունների արդյունքում բոլոր նախկին իշխանությունները և բոլոր օլիգարխները վերջնականապես և անվերադարձ դուրս են շպրտվելու քաղաքական դաշտից»։
Փաշինյանի թիմից պազաբանում են՝ նախկիններին ու օլիգարխներին դուրս շպրտողը քաղաքացին է լինելու. «Ինչպես են մերժվելու՝ քաղաքացու քվեով»,- ասում է իշխող ՔՊ-ից Հասմիկ Հակոբյանը։
2026-ի խորհրդարանական ընտրություններին մասնակցության հայտ ներկայացրած ընդդիմադիր ուժերը, մինչդեռ վստահ են՝ Փաշինյանին հաշված օրեր են մնացել և հունիսի 7-ից հետո նրա իշխանությունը հեռանալու է: