მუსტაფა ემრე ჩაბუქის ბრძოლა ლტოლვილის სტატუსისთვის გრძელდება
22 იანვარს თბილისის სააპელაციო სასამართლოში მუსტაფა ემრე ჩაბუქის ადვოკატების სარჩელი განიხილებოდა. დემირელის სახელობის სკოლა-ლიცეუმის მენეჯერის დაცვის მხარე ითხოვდა ბათილად ეცნოთ პირველი ინსტანციის სასამართლოს გადაწყვეტილება, რომლის მიხედვითაც მუსტაფა ემრე ჩაბუქსა და მისი ოჯახის წევრებს უარი ეთქვათ ლტოლვილის სტატუსის მინიჭებაზე. ამჟამად ჩაბუქი, რომელიც ქართველმა სამართალდამცველებმა 2017 წლის მაისში თურქეთის მოთხოვნის საფუძველზე დააკავეს, წინასაექსტრადაციო პატიმრობაში იმყოფება. ანკარა ჩაბუქს ფეტულა გიულენის „ტერორისტულ ორგანიზაციასთან“ კავშირში ადანაშაულებს, რასაც მუსტაფა ემრე ჩაბუქი კატეგორიულად უარყოფს. ქართველი უფლებადამცველები მიიჩნევენ, რომ ჩაბუქისა და მისი ოჯახისთვის ლტოლვილის სტატუსის მინიჭებაზე უარის თქმა მისთვის საფრთხის შემცველია, ექსტრადიცია კი დაუშვებელი, რადგან მას თურქეთში არაადამიანური მოპყრობის საფრთხე ემუქრება. 22 იანვარს სააპელაციო სასამართლოში ჩაბუქის საქმის განხილვა გადაწყვეტილების გარეშე დასრულდა და მომდევნო სხდომა 26 იანვრისთვის გადაიდო.