ძიუდოისტები კულტურისა და სპორტის მინისტრს შეხვდებიან
საქართველოს ძიუდოს ფედერაციის პრეზიდენტმა დავით ქევხიშვილმა თავი შეიკავა ძიუდოისტებთან შეხვედრისგან. საქართველოს ეროვნული და ახალგაზრდული ნაკრებების წევრები ძიუდოს აკადემიაში დღეს ჟურნალისტებთან და გულშემატკივრებთან ერთად შეიკრიბნენ, რათა მათივე თანდასწრებით მიეღოთ ფედერაციის პრეზიდენტისგან პასუხები ყველა შეკითხვაზე.
„სამწუხაროდ დავით ქევხიშვილმა კიდევ ერთხელ აარიდა თავი ჩვენთან პირადად შეხვედრას. მიზეზი მარტივია, მას არ შეუძლია მთელ რიგ დარღვევებთან დაკავშირებულ საკითხებზე ღიად საუბარი“, - განაცხადა საქართველოს ნაკრების წევრმა ზებედა რეხვიაშვილმა.
16:00 საათზე სპორტსმენები კულტურისა და სპორტის სამინისტროში მივლენ და მინისტრ მიხეილ გიორგაძეს გააცნობენ თავიანთ მოთხოვნებს. შეხვედრის ინიციატორი თავად მინისტრია.
საქართველოს ძიუდოისტთა ნაკრების წევრები ფედერაციის პრეზიდენტ დავით ქევხიშვილს ქართული ძიუდოს არასწორ მართვაში ადანაშაულებენ და მის გადადგომას მოითხოვენ.