შსს: 17 მაისს აქციაში მონაწილე თითოეული ადამიანის გამოხატვის თავისუფლებას დავიცავთ
17 მაისს ჰომოფობიასა და ტრანსფობიასთან ბრძოლის დღესთან დაკავშირებით შინაგან საქმეთა სამინისტროში უწყების ადამიანის უფლებათა დაცვის დეპარტამენტის დირექტორმა ლონდა თოლორაიამ სპეციალური პრესკონფერენცია ჩაატარა, სადაც თქვა, რომ შინაგან საქმეთა სამინისტრო მოწოდებულია დაიცვას ნებისმიერი მოქალაქის უფლება, განურჩევლად მისი რასის, კანის ფერის, ენის, სქესის, რელიგიისა და სხვა შეხედულებებისა. მანვე დასძინა, რომ 17 მაისს ჩასატარებელ ღონისძიებასთან დაკავშირებით შინაგან საქმეთა სამინისტროსა და არასამთავრობო ორგანიზაციების წარმომადგენლებთან ჩატარდა შეხვედრები, სადაც შეთანხმდა ღონისძიებების გამართვის როგორც ადგილი, ასევე უსაფრთხოებისთვის გასატარებელი ზომები.