კიშინიოვის მერის არჩევნების პირველ ტურში პრორუსული პარტიის კანდიდატმა გაიმარჯვა
მოლდავეთის დედაქალაქის, კიშინიოვის მერის ვადამდელი არჩევნების პირველ ტურში ხმების თითქმის 41%-ით გაიმარჯვა პრორუსული „სოციალისტური პარტიის“ კანდიდატმა, იონ ჩებანმა. მეორე ადგილზე ხმების 32%-ით გავიდა პროევროპული პარტიის, „ღირსების და სიმართლის პლატფორმის“ კანდიდატი, ანდრეი ნასტასე. მერის არჩევნების მეორე ტური 3 ივნისს გაიმართება. კიშინიოვის მერის ვადამდელი არჩევნები მას შემდეგ დაინიშნა, რაც 2018 წლის თებერვალში ამ თანამდებობიდან გადადგა პროევროპული „ლიბერალური პარტიის“ ერთ-ერთი ლიდერი, კორუფციაში ბრალდებული დორინ კირტოაკე. კიშინიოვის ყოფილი მერი მის წინააღმდეგ აღძრულ სისხლის სამართლის საქმეს პოლიტიკურად მოტივირებულად მიიჩნევს.